المهنة مصرى

ملعون
بداء العشق من صغرى
وحبيبتى مسجونة ف قصر بعيد
تركت قلبى يروحلها
خافوا .!
طلقوا على قلبى كلاب الصيد ..!!
ملعون بعشقك لأنى
زرعة ربانى
أم ابتلاها الدهر بالوحدة
عيل بيرهن ضحكته ع الفجر
والفجر فجرك رغم أنه مجاش.!!!
أوقات بسيبك وشتمك
والعن حواريكى
بلعن القهوة اللى ملت من قعادى
زحمة المترو
نسمة الكورنيش
ضحكة حبيبتى وضحكتك..
كلمة بلادى !!
وأوقات كتيرة بعشقك
أكتر من الروح والوجود
بعشق الدمعة اللى ساكنة
جوف ترابك
واعشق الطين اللى لطخ جبهتى وقت الشقا
وسنين عذابك
ازاى كدة؟!!
ازاى تكونى كل ده
يا أحلى كلمة كرهتها وعشقتها
قلبى ف هواكى مستحيل يفضل كدة ....!!! ...
المهنة مصرى والوجع
ساكن حيطان كل البيوت
ساكن حوارى السيدة وسيدنا الحسين
جوة قلوب
كل اللى حبوا طلتك
ومابين ضلوع العاشقين للصمت
المهنة مصرى ودمعتى ع الخد
وضحكتك ف القلب
أرض مالها حد.!!
بلدى
أجمل جميلات البلاد
رغم القسى
رغم العناد
تلقاها دايما بنت حلوة وبضفاير
ضحكة صافية
طافية فوق وش السما
الشمس دايما منها تتمايل
ساعة البكا
تفرد قلوعها بالقوى
وف الحنين
تحضن جميع الخلق ف ضلوعها
بلدى اللى من حبها
مات الجميع فيها
ولما قسيت قوىي
نادى الجميع
ليها