قلبى الغريب

(1)
قلبى الغريب أنا بسألَك
منين ساعات بتكون حَيَالله
ريشه طايره ف الهوا
شبه اللى ياما قبل منك برده طاروا
سايقك مسار الريح وراضى باختيارُه
يحييك ساعات لما يِحِنّ
وساعات كتيرة بيقتِلَك
ومنين ساعات بتكون شجر.. .
باصص لفوق
منعاك كرامتك م اللجوء.. .
لدموع بتِكْشِف ضعْفِنا
كُلَّك ثَبات
قادِر تِدارى الحُزن ف جراب السُكات
صابر أوى.. على جرح جىّ ف مَقْتَلَك
قلبى الغريب أنا بسألك
(2)
يا قلب مبيِلْمَحش نَفْسُه
لمَّا يبُص ف المرايات
من إمتى كان رَقْص الغوازى
ينفَع على دمْع النايات؟
يا قلب عاشق للحياة
يا قلب مَلْمِل م السِكَك
يا شيخ ملامحه عَجِّزِت واتعَكِّزِت
على طفل مَتْعَلِمش غير.. يِرسِم حياتُه ع الدِكك
يا نجم عالى ف السما
وبرغم ده ما أوحلك؟!
قلبى الغريب أنا بسألك
(3)
يا قلب مليان بحكايات
يا ضحكة ف ضلوع الآهات
يا (ألزهايمر) جوَّه مِنُّه
عايشة كُل الذكريات
يا وَلَد رافِض يؤُش
يا أَسَد ساكن ف عِش
يا هدوء كل الجناين
يا قَلَق قلب الحارات
يا اللى كل الدنيا مِلْكَك
وانت وَحْدَك بالإيجار
يا جعان وتمللى تِحْبِس
بعد جوعك بالسيجار
يا اللى واخِد ضِحْكِتك
تَقْشيرة للحُزْن البعيد
تِضْحَكْها يبقى الكون سعيد
فتسيبه يفرَح مَطْرَحُه
وتدور مع
دورة همومك ف الفَلَك
فإزاى كده؟
قلبى الغريب.. أنا بسألك