بحر الوجع واقف بعيد / وما لهش فَرْحْ وما لهش عِيد/ واقف يعذب فى البلد من سينا يجرى / لوجه بحرى.. للصعيد الآه تقولها اسكندرية / الصوت يِرِنّ ف بورسعيد ........................... كل الوشوش الحزن طالع مِنَّها/ رغم ان حُكْمُه راح خلاص انتهى / القصد كان....... نفسى اقولِّك كلمتين / بس الزمان...... بيقول دا كُلُّه سلف ودين ........................ وانتى بقى يا بنت الحلال / إوعاك تقولى الحظ مَال / فين الضفاير اللى كانت /سارحه فوق خد الجميل / فين أحلى بحر / وأحلى ميه وأحلى نيل/ فين اللى كانت أُم دنيا / أم اللى عبروا وكَبَّرُوا / ساعة ما عَدُّوا المستحيل .......................... هو انتى ليه حُبك عذاب / يا حنينة يا ام الضفاير / دايما معاك القلب حاير/ قومى افتحى كشف الحساب/ شوفى اللى عامل نفسه وطنى/ واللى عامل نفسه ثاير / واللى بيقتل فى الشباب قومى افضحى لؤم اللئيم / واللى عمره فى يوم ما تاب ...................... قومى افضحيهم كلهم / عرّى المخبّى واللى بان واللى يِخَبَّط عالبيبان / واللى حياتهم كلها كان اللومان / واللى أساتذة فى السِّباب ........................ قومى افضحى كل اللى فات / هاتى كتاب الذكريات / وعَرَّفِى مين اشتراك / ومين اللى خان / أصل اللى يقتل ف النهارده / هو اللى قاتلك من زمان ......................... إنتى اللى طمعتينا فيك/ طبعك كده دايمًا مِسَامْحَه / ولو بِيقْطَع فى الوريد / بتقول مصالحة / هى المصالحة بس بوسة وكلمتين ولّا المصالحة انسى اللى فات / نام عالسرير ومخدتين/ ولّا المصالحة / خلّى النيران جوه الصدور/ والحقد لما بْيِمْلَى عِين .......................... وفى الحقيقة / دمك بقى عنده رخيص / أصل البعيد ويّا الخسيس / لا يهمّه موت / ولا همّه شعب / ولا همّه جيش / ولا البوليس ................ الدم عادى بيشربه / زى السجاير / علشان كده خليتى قلبى بِمُرُّه صابر/ يلّا افتحى كشف الحساب /يا حنينة وفُكِّى الضفاير د.هانى أبو الفتوح