بحبك يا مصر

بحبك يابلدى بعقلى وروحى ومنايا
أمشى فى شوارعك
أكتب بإيدى الحكاية
لأنك يا بلدى عشقى وغرامى
ما أنتى فى دمى وأنتى دوايا
وأشوفك قصادى صوتك ينادى
أجرى عليكى ألبى الندا
وعمرى فى مرة ما أقولك كفاية
............................
بحبك يا مصر
يا أصل الغرام
بحبك حروف جوه قلبى تِدُوبْ
واوعى تقولى حروفك كلام
و بَرْسِم ملامحك فى قلبى بريشة
وأنا فى بُعدى عنك ما أحِسِشْ بعيشة
وأيام تعدى عليا ما نام
...........................
فاكرة يا مصر زمان
كنت أنام عالرصيف وأحس بأمان
وفاكرة كمان
أما كانت سماكى لحِاَفْ
كانت سعادتى فى القرب منك
ولو أكلها حَافْ
دلوقتى يا مصر
أمشى فى شوارعك بجد بخاف
..........................
وشوش ... لكن غير الوشوش
شوية أشوفهم أقول أهل بلدى
وناس تانية أشوفها أقول دول وحوش
وناس تانية واقفة سلاحها معاها
تقول دول جيوش
وناس غاوية سلطة وكرسى وعروش
وناس عايشة بس تعبى فى كروش
وناس تانية غلابة
مش لاقية لقمة ويادوب كام قروش
.............................
فين العدالة فى برك ياغالية
وفين الوشوش الطيبين
فين الأسمرانى اللى بيحب بلده
ولونها فى لونه وعرق الجبين
فين اللى بيحب جاره
واقف معاه فى ليله ونهاره
يشاركه فى فرحه ولو كان حزين
وكنا فى حارة اللقمة واحدة
نقسمها بيننا ما نسأل لمين
وعشنا وفضلنا طول السنين
لا جارى مسيحى ولا جاره مسلم
مافرقنا دين
الضحكة بيننا واللمة حلوة
لكن دلوقتى.. متفرقين
قولى بجد مش إحنا ولادك
لو هنفضل كده رايحين لفين؟
.....................
طيب تعالى ...
وخليكى جنبى وخليك قبالى
وجاوبى ياغالية وبُصى لسؤالى
إيه اللى حاصل فى كل حتة
ووسط الشوارع
شايفه اللى سابوا المكن والمصانع
وسابوا الزرعة
لاعايزينها تطرح ولا تكون مزارع
وبدال السنابل وغصن الزيتون
شالوا السلاح وطالبين مدافع
ولا حِكمَة نافعة ولا حِلْمْ نافع
وسابوا بيوتهم ونزلوا الميدان
وقالوا تعالوا نعبى المكان
ولا نمشى منه غير بالقنابل
وريحة الدخان
هتردى وتقولى دول برضو ولادك
طيب قوليلى فين الأمان ؟ فين الأمان ؟
........................
جايز تقولى ليهم مطالب
ما نصبر يا مصر وأمر الله غالب
طيب كمان عندى سؤال
جايز يا بلدى وفيها احتمال
يهدى لنا ناس تقول كلمة حلوة
فى شاشة وإذاعة
وللا فى جريدة مكتوبة ومقال
قوليلى يا مصر يا نور العيون
ماحققتيش يا مصر
وشفتى لنا مين اللى فتحوا السجون؟
وليه بلطجية فى شوارعك كده
على كل شكل وعلى كل لون؟
وجيش الفساد إللى سكنوا الليمان
إللى نهبوا خيرك وسابوا لنا الديون
إمتى الحقيقة بجد تبان؟
عشان بس نهدا وبدال الجنون
وبدال الشكوك وبدال الظنون
نرجع لك إنتى ولادك بجد
مانعرفش خوف ونعرف نصون
ونرجع نِعَلِى وبالعلم نبنى ونحب بعض
ولو ماتش كورة ما نرمى حجارة
يا أم الثقافة يا أم الحضارة وأم الفنون
بحبك يا مصر.. وأدعيلك يا مصر
بقلبى الطيب قلبى الحنون. وبدعى يارب
اهد لها واحد يستاهلك يا مصر
نِشِيلُه معاكى فى نن العيون