أحمد عفيفي يكتب: الراجل اللي واقف ورا عمر سليمان و «القفا» أحمد موسى!!

حد يقوله ياجماعة .. مفيش مذيع يجيب ضيف ويفضل قاعد "مبرّق" له بالشكل العبيط ده .. مش عشان عايز يخوّفه ولا حاجة .. لكن من دهشته مما يقوله هذا الضيف وكأنه يقول جديدا .. مع إن العيل في بطن أمه يعرف بديهيات لاتحتاج للتبريق وفشخة البق .. لكن الأخ احمد موسى كأنه خرج من تالتة ابتدائي وصاع له كام سنة في الشارع وبعدين كده ومن غير أى مناسبة اشتغل مذيع!
الافندي كان امبارح مستضيف افندي تاني برتبة لواء "مخابرات " .. كلنا عارفينه من يوم 11 فبراير 2011 .. الراجل اللي كان واقف ورا عمر سليمان .. وقبل ما اتكلم عنه حاقولكم حكاية كده ع السريع : قابلت مرة هنا في الكويت مدير مستشفى كبير وعرفت انه كان ضابط مخابرات في مصر وتقاعد .. الكلام ده بعد ثورة يناير بكام شهر .. ففرحت جدا وقلت في نفسي كنز واتفتح قدامي .. اسأله بقى عن وعن وعن .. لكن الرجل – لأنه رجل – بص لي بصة معجبتنيش بتقول م الأخر اني في نظره ساذج وعبيط .. وراح قاللي : انت متخيل اني ممكن اتكلم معاك حتى على المستوى الشخصي عن المخابرات العسكرية المصرية ؟ .. فما بالك بقى وانت صحفي ومتصور اني ممكن ابوح لك بأسرار مخابراتية تخص مصر؟ .. عندي بالقطع كلام ممكن يكسر الدنيا واتشهر وافرح زي العيال بصورتي في الجورنال .. لكن رجل المخابرات صندوق اسود بجد محدش يجرؤ يفتحه الا بأوامر عليا وفي غرف مغلقة .. فقلت له بسذاجة ايضا : لكنك الان خارج الخدمة .. متقاعد .. فرد : لكنني اقسمت يمينا ان احافظ على اسرار الدولة حيا وميتا!
هى دي المخابرات .. عشان كده انا مستغرب ازاى الحكومة ووزارة الدفاع سايبين اللواء حسين كمال " الراجل اللي واقف ورا عمر سليمان " نازل عك وكلام سواء في الصحف او التليفزيون .. انا فاكر قبل 30 يونيو 2013 انه قال حيعمل مؤتمر صحفي ويقول فيه اسرار محدش عرفها ولا يمكن يعرفها .. وكنت مستغرب .. ازاى الكلام ده .. ده عمر سليمان اللي هو عمر سليمان مفتحش بقه بكلمة في العلن .. الا قصاد المحكمة وفي جلسة سرية في محاكمة مبارك .. ورجال المخابرات بصفة عامة مش نجوم فضائيات ولا ناس مرطرطة من ستوديو لاستديو .. دي ناس متكلفة ومش بتاعت منظرة وكلام هجص .. دي ناس تخاف حتى تتكلم مع نفسها من فرط حرصها على الكتمان .. اقوم الاقي الراجل اللي كان واقف وراه هو اللي غاوي شهرة ومنظرة وفاكر نفسه حسين كمال المخرج بتاع ابي فوق الشجرة ومولد يادنيا .. وجي مع القفا احمد موسى ساعتين او تلاتة عشان يطلع في التليفزيون .. ايه المسخرة دي .. وبعدين يقول كلام احنا كلنا عارفينه .. بس بالاجتهاد مش نسمعه ع الهوا من رجل كاتم اسرار دولة .. وبعدين يقولك ان الجيش والمخابرات تعمل لصالح الشعب المصري .. مش لصالح رئيس الدولة .. ياصلاة النبي .. جبت التايهة ياخويا وعلى رأى سهير البابلي نشنت ونشانك رشق .. يقوم القفا اللي قصاده " فاشخ بقه " .. ومستغرب اوي من كلام الراجل ويسأله : معقولة المخابرات بتعمل لصالح الشعب مش لصالح الحاكم ؟ .. سؤال غبي بدرجة يفقع مرارة اللي معندوش مرارة اساسا .. وصاحبنا الضيف اللي مصمم يبقى نجم تليفزيون ويسيب شغل المخابرات هاتك ياشتيمة في مرسي واللي جابوا مرسي .. وانه كان ساعة مادعى لمؤتمر صحفي حيقول كلام خطير لكن جاله تهديدات صريحة بالقتل لو فتح بفه بكلمة .. فخاف على نفسه وعلى بيته وعياله وقال كلام فارغ مالوش لازمة خلّى الصحفيين والاعلاميين اللي حضروا كانوا عايزين يضربوه ولسان حالهم يقول : أمال بس عامل فيه الراجل المهم .. وفي الأخر تطلع عبده مشتاق!
هو اساسا مش مفروض يتكلم خالص .. ولا يظهر في اى وسيلة اعلام .. انتوا فاكرين بعد 11 فبراير وايام المجلس العسكري بتاع طنطاوي لمّا منى الشاذلي استضافت كام عضو من اعضاء المجلس واعتبرت ان ده سبق اعلامي محصلش .. وكان فعلا سبق اعلامي ومحصلش – لأننا مش متعودين نشوف ضباط جيش ضيوف برامج توك شو .. بس حتمية اللِحظة وقتها خلّت ظهورهم مقبول ومستساغ وطبعا هما جايين مش من نفسهم ولا غاويين شهرة ولا فرحانين انهم حيشوفوا منى الشاذلي ويقعدوا معاها .. جايين باتفاق وبإذن وعارفين حيقولوا ايه وميقولوش ايه .. وبعدين كان ظهورهم في الوقت ده امر حتمي لانهم هما اللي كانوا بيحكموا البلد .. بس في الظروف العادية لايمكن ابدا اشوف قائد جيش جي وبيتكلم في برنامج تليفزيوني وكأنه مطرب مشهور او ممثل نجم .. بس الراجل اللي ورا عمر سليمان غاوي شهرة .. ولقى " قفا " يقعد قصاده فاتح له بقه ومبرق له في عينه وعلامات الدهشة التي تنم عن جهل مالية وشه .. فراح قاعد هو كمان يبخ بختين مالهمش لازمة .. بس كان حريص اوي انه يقول زي توفيق عكاشة ما قال " وما اسخم من ستي الا سيدي " ان هو السبب في 30 يونيو وهو اللي قال للناس انزلوا ومترجعوش البيت الا ومصر في ايديكم .. لو سيبتوها للإخوان حياكلوها .. قامت الناس عشان بتحبه وشبّعته تريقة من ساعة ماكان واقف ورا عمر سليمان نازلة الشارع وحلفوا ماهم راجعين الا ومصر في ايديهم.
ايه ياجماعة اللي بيحصل ده .. وفين وزارة الدفاع وفين الحكومة .. وازاى تسيب الجدع ده يظهر اساسا في اى حتة ويتكلم اى كلام .. ده حتى لو متقاعد ولا مستقيل من منصبه ممنوع عليه يتكلم " وضربت لكم مثال لمدير المسنتشفى في الكويت " .. ولا هى بقت سويقة وسبوبة ومفيش انضباط .. وكل اللي نفسه في حاجة يعملها ؟
اما اخونا احمد موسى اللي عامل نفسه حامي حما الديار ومصر امه وخالته ومرات عمه .. اللي انت بتعمله ده .. بيقولوا عليها حاجة عبيطة .. واذا كنت ناوي تقضّيها فاشخ بقك ومبرق عنيك .. فافتح لك كتاب .. اقرا واعرف وافهم .. او حاول وانت دلوقتي مذيع مشهور ولك اتصالات ترجع تاني المدرسة وتاخد على الاقل الابتدائية .. مش تخرج من تالتة ابتدائي وعامل فيها احمد زويل .. وفرحان اوي انك جايب الراجل اللي كان واقف ورا عمر سليمان .. أمال لو كان واقف قدّامه مش وراه .. كنت عملت فينا ايه؟!