أحمد عفيفي يكتب: ياطولة بالك .. ياعم أيوب!!

خلص الاستفتاء ع الدستور بنتيجة مبهرة .. 98% .. ايه اللي حصل بعدها.؟ .. الرئيس والسيسي والحكومة شكروا الشعب .. العفو ياسيدي انت وهو وهو .. ده واجبنا وبنعمله وعملناه .. انتوا عملتوا ايه بقى؟ .. انتخابات الرئاسة الاول ولا البرلمان؟ .. سوري .. لسه مش عارفين .. بندرس الامر على مهلنا .. اوعوا تكونوا قلقانين ولا تكونوا زهقانين .. ما انا جي وغلاوتك لاجي .. الحمد لله .. تصدقوا وتأمنوا بالله .. انا قايم م المحل من اسبوح .. بس أديني اهو جيت .. ماشي ياعم ايوب .. السيسي حيرشح نفسه ولا مش ناوي ؟ .. لسه بيفكر .. احنا ورانا ايه .. الدستور وعملناه والشعب طوّل رقبتنا وقال نعم .. نستريح بقى شوية .. قيمة شهر ولا شهرين لما الاخوان يجيبوا اخرهم .. بعدين اقول حترشح ولا حافضل وزير الدفاع .. " حمدين صباحي قال انه نازل وبدأت السكاكين تتسن والدفاتر القديمة تتفتح .. ده كان موافق على ترشيح جمال مبارك .. وايام حرب الخليج كان مع صدام حسين وقبض التمن " مبلغ محترم " .. ايه رأيك ياعم ايوب ؟ .. " يابني ابعد عن طريقي يابني .. انا سكتي وحشة كلها خوازيق .. عليا النعمة حاخطفك .. واد يا بشلة.. واد يا سنجة .. ميغركش منظري .. ده انا عربجي!
طيب طاهر ابو زيد وزير الرياضة اصدر قرار بحل مجلس ادارة الاهلي .. وم الأخر كده طاهر ابو زيد مش بيحب الخطيب من زمان .. كان شايف نفسه احرف منه مليون مرة .. بس الخطيب كان واكله في الشعبية .. ابو زيد يجيب الجون والجمهور يقول بيبو .. يعني المسألة تصفية حسابات قديمة .. يقوم كل واحد من اللعيبة القدام يدخل في الموضوع ويصفي هو كمان حساباته .. ورئيس الحكومة الجميل بعد قرار ابو زيد بساعتين يصدر قرار بالغاء قرار وزير الرياضة .. يقوم حسن حمدي يطلّع لسانه لابو زيد " بعينك ياروح امك " .. يقوم طاهر يقول حستقيل .. وبعدين يرجع تاني في استقالته وياخد القلم على قفاه ويسكت .. يقوم الببلاوي يقول حنشوف الحكاية دي بعد 25 يناير اللي جي .. واللي بيتمني انه ميجيش .. اصل البيه خايف من رد فعل الالتراس الاهلاوي .. والالتراس بيهدد لو مجلس الاهلي اتحل وقرار ابو زيد بقى نافذ حيولع الدنيا .. ورئيس الحكومة خايف من الالتراس .. ولهم سابقة ايام محاكمة الجناة في مذبحة بور سعيد .. قامت المحكمة ريّحت دماغها وطست كام واحد حكم بالإعدام .. هما اللي عملوها مش هما .. المهم نقفل الملف ونتقي شر الاهلاوية " ولاد اللذينا " .. طيب ياعم ابو زيد زمانك مطلعتش راجل ليه وقدمت استقالتك رسميا ؟ .. يقوم يرد : ما انا لو عملت كده حيفرح فيا الخطيب وحسن حمدي حيعّلم عليا .. وانا وزير الرياضة ومحدش يضربني على قفايا ... " هو انت لسه حتنضرب .. ما القفا نزل وسكع قفاك والمسألة خلصت خلاص ".
وعم فريد الديب مع الافندي احمد موسى : حسام عيسى نائب رئيس الوزراء اهبل وعبيط .. وماسك جرنال الاهرام من يجي خمس ايام .. وحديث مع حسام عيسى وهو بيقوا انا اهبل وعبيط لأنه كان مع الاخوان قلبا وقالبا وبعدين طلعوا بعد كده " عِرر " وولاد كلب .. واحمد موسى قاعد " مذبهل " .. مش مصدق ان حسام عيسى قال على نفسه كده .. والحديث في الاهرام اللي موسى شغّال فيها من خمس ايام بس .. حاجة تضحك وتقرف في نفس الوقت .. على طول فاتح بقه ومبرق عينه سي احمد افندي موسى و " مذبهل " كأن الديب بيقول حاجة جديدة .. وهو مش بيقرا جرناله اللي بيشتغل فيه .. والديب مستمر وبقى عامل زي مرتضى منصور .. شايل معاه قصاصات من الجرايد وكله بالمستندات ياحليوه .. ومندهش ان سامي عنان له عين انه يترشح للرئاسة .. بعد ما سلم البلد ع المفتاح للإخوان .. يقوم المتخلف موسى " فاشخ " بقه : معقولة اللي بتقوله ده .. عنان سلم البلد للإخوان؟ .. والديب مستغرب من غباء المذيع وهبله : ده العيل في بطن امه عارف ان طنطاوي وعنان لعبوا اقذر لعبة في حياتهم وضحوا بالبلد لمصلحتهم الشخصية.
طيب .. 25 يناير اللي جي .. مانشيتات الصحف : الاخوان ناويين وحالفين لياخدوا حقهم تالت ومتلت .. و 6 ابريل .. اما ان يخرج احمد ماهر ومحمد عادل واما حتشوفوا اللي عمركم ماشفتوه .. والنشطاء اللي مش مع 30 يونيو وشايفين انه انقلاب : الثورة التالتة جاية والتالتة تابتة .. والداخلية : لو جدع وراضع من بز امك عن حق .. تقرب من قسم شرطة .. حننفخ امك واللي جابوك .. ومش عارف كام الف من الشرطة على كام الف من الجيش عشان الاحتفال بثورة يناير .. هو احتفال ولا حرب .. ؟
المهم كل ده بعد نجاح الاستفتاء ووقفة الشعب المصري الرائع .. بدل مايردوا له الجميل ويريحوه انشالله بكلمة حلوة .. لخبطوا كيانه .. وكأنهم بيقولوا له لو حتنزل تحتفل ب 25 يناير تبقى مطوتك في ايدك والسكينة في جيبك والمولوتوف تحت الجاكتة .. واللي يقرب منك انسف اهله.. اصلها بايظة بايظة .. وشكل امها ملهاش نهاية .. صحافة متخلفة " ان مر يوم من غير تخويف مينحسبش من عمري " .. ومذيعين قباقيب اجهل من دابة تمشي على اربع : " ربنا يستر يوم الاحد اللي جي .. اللي نازلين مش شوية وجبهات لها قيادة والشعب الغلبان مالوش حد يسوقه " .. وحكومة مش عارفه تحافظ على كرامة وزير عندها حتى لو كان غلطان .. والسيسي لحد دلوقتي مقلناش : ناوي يترشح ولا خايف .. وناس تسألني : السيسي يخاف.. انت اهبل ؟ .. ده بس بيحسبها بالورقة والقلم قبل القرار الصعب .. وعم ايوب لسه واصل دلوقتي مع انه قايم من المحل من اسبوح .. اسبوح ياعم ايوب ؟ .. ايوه .. اصلي بمشي في الجزمة الاول .. وواضح كده في الاخر اننا كلنا اللي حناخد بالجزمة .. عشان طلعنا رجالة ووقفنا وقفة رجالة مع ناس واللي يزعل يتفلق .. مش رجالة!!