أحمد عفيفي يكتب: ما تيجي نرقص!!

فيلم هزلي وابن ستين كلب من سذاجته وغبائه وتخلفه العقلي.. ماهو حاجة من اتنين .. إما يكون الشعب المصري كله غبي ، ويستاهل اللي يجرى له .. وإما يكون المجلس العسكري هو اللي مش عارف حاجة في أى حاجة وورطنا كلنا في الإعلان الدستورى بتاع مارس والإخوان" أيوه الإخوانى " .. وضيّع ع البلد سنة وشهر تقريبا .. نهاتي و" ندّن في مالطة " وقاعد هو والإخوان والسلفييين وبتاع غزوة الصناديق ومعاهم عم الشيخ حسان " الهامورجي .. مش الخمورجي .. نسبة الى الهامر بتاعت فضيلته " .. قاعدين يضحكوا ويقولوا في نفسهم علينا طبعا : اخدوا بومبة محترمة واللي في دماغنا عملناه.

صدّقه الإخوان والسلفيين ربنا ينتقم منهم ، ماعدا المحترمين فيهم ، وسعادته .. ساعة الجد راح ضارب كرسي في الكلوب وزحلق الشاطر وابو إسماعيل ومعاهم - للتهدئة .. نعم للتهدئة - عمر سليمان ، وبعدين قال لك كأنه معانا - وخد بالك من كأنه معانا - : اللجنة الدستورية المئوية دي فعلا متنفعش ومسلوقة سلق ، والثوّار والناس المحترمة بجد عندهم حق .. ياللا.. بلا لجنة بلا هباب أزرق..نعمل واحدة تانية ولازم الدستور يتعمل قبل الانتخابات .. هو ده الصح .. كان عندهم حق اللي قالوا " لأ " .. وانا دلوقتي اقتنعت بكلامهم فعلا .. " خد بالك .. هو كده كأنه معانا "!

..عشان كده يا حبايبي الحلوين ياطعمين يا مأطأطين و " مطقرطسين " ونزولا على رغبة الناس اللي عايزة مصلحة البلد مش مصلحتها الخاصة ، نعمل الدستور الأول.. واديني قاعد لحد ما اطمئن على البلد .. حكم دي مصر يا جدعان مش كوالالمبور .. وكلنا شربنا من نيلها وجربنا نغني لها.

ونسأل : طيب وانتخابات الرئاسة يا افندية بكابات ونجوم على الأكتاف ؟ .. يرد : طبعا حنعملها .. هو معقولة نقعد من غير رئيس.. دي مصر اللي شربنا من نيلها وجربنا نغني لها ، بس فات الكتير ومبقاش الا القليل .. ما انا جي وغلاوتك لا جي .. بس محدش " يستعكلني " .. تصدقي وتأميني بالله .. انا قايم م المحل من " إسبوح " .. بس أديني وصلت.. طيب يا لا بقى يا عم المجلس.... أصل انا بمشي في " الكزمة " الأول .. بس انا جي وغلاوتك لا جي .. إييييييه .. كلكوا عليا ولا إيييييه .. لأ .. لأ .. ميغركش منظري ده انا " عربكي " . .. بالضبط المجلس
العسكري عامل زي عم أيوب في مسرحية " الجوكر" يومه بميت سنة .. الحاجة اللي تخلص في يومين يخلصها في سنتين وبمزاجه.. منتهى اللؤم واللّوع .. حاطط في دماغه ان الشعب غبي ، مع ان اللي يستغبي غيره هو الغبي الحقيقي .. فاكر إن احنا مش فاهمين هو عايز يقعد ليه
، ومش عايز يسيب التركة ليه.. أكثر المتشائمين من المجلس العسكري قال لك : لا حيمشي في يونيو زي ما قال .. وترد عليهم : طيب ماهو ذات نفسه قال برضه حامشي بعد 6 شهور .. ويرد الأغبياء - السذج منهم واللي بيستعبطوا - : أيوه قال .. بس ماكنش ينفع يمشي.. ونرد باستهزاء : عندكم حق ماكنش ينفع يمشي ، والا ما كنش حيحصل اللي حصل في البالون وماكنتش مذبحة ماسبيرو ولا محمد محمود ولا مجلس الوزراء .. واخيرا مجزرة بور سعيد .. صحيح لو كان المجلس مشي كان مين اللي حيموّت عيالنا؟! .. نجيب إسرائيل يعني تموّتنا وعندنا المجلس..؟ .. دي
حتى تبقى عيبة .؟. مش بيقولوا " قتل الحبيب زي أكل الزبيب " .. وتخيّلوا كده لو إسرائيلي ابن جزمة هو اللي عرّى " ست البنات " وكشف لحمها .. مش كنا أكلناه أكل؟ .. انما المجلس واحد مننا .. وبناتنا بناته .. فمفيش مشكلة .. ماجتش على ديه .. عيل وغلط والسماح ياهل السماح .. أصل السماح طبع الملاح .. يابخت من سامح. الانتخابات حتتأجل .. لحد ما نعمل الدستور .. والناس حتسكت .. زي ما سكتت قبل كده .. إذا كنا موّتنا عيالهم وسكتوا .. مش حيصبروا عشان نحط الدستور وبعدين نجيب رئيس على أساس نضيف.. طيب على رأى المثل " خليك ورا الكداب لحد باب الدار" .. حدّد لنا يا سعادة المجلس وقت عشان نطمن .. ماهو طول ما احنا قاعدين من غير رئيس ، حنفضل نخبط ونطلع
من نقرة نقع في دحديرة .. ويرد المجلس على طريقة خالتي بهانة : نقرة إيه بس ودحديرة إيه .. الشر بره وبعيد .. ياراجل " تف من بقك " .. كل حاجة حتبقى تمام .. وعلى رأى عم أيوب تاني : فات الكتير مبقاش الا القليل .. وانا جي وغلاوتك لا جي .. بس بقى يا " كماعة " خلّوني اركز واعرف افكر .. إييييه كلكوا عليا ولاإييييه .. لأ .. لأ .. ميغركوش منظري .. ده انا " عربكي" .. واد يا بشلة .. وانت ياواد يا موس .. اقطع لي لسان كل واحد مش عاجبه كلامي ، وفاكر انه خايف ع البلد أكتر مني.

اللواء شاهين يقول لك : لا نية لتأجيل الانتخابات .. ونفهم من كده ونبصم بالعشرة أنها حتتأجل أكيد .. لأني مش حاحاسب واحد على نيّته .. لو كان جاد " مش بتاع الفول والطعمية على فكرة " في كلامه ، كان قال بصراحة وكلام ميخرش الميه : الانتخابات في موعدها اللي حدّدناه واحنا رجالة وعساكر ، والراجل بيتمسك من لسانه ، وشرف العسكرية مفيهوش فصال ، وزمان قالها عبد الناصر : قلنا حنبني وادي احنا بنينا السد العالي
.. واحنا أهو بنقولكم : ان شاء الله حيكون فيه رئيس لمصر .. بس أوعوا تكون قلقانين .. ولا " مستعكلين " .. بس انا جي وغلاوتك لا جي.
وإذا صبرنا على عم أيوب .. يبقى مش جي في سنته السودا .. وأحلى حاجة بقى حا اقولها للمجلس العسكري مادام المسألة تهريج في تهريج : ما تيجي نرقص .. بلا دولة بلا دياولوا .. وسيبك بقى من مشربتش من نيلها وياحبيبتي يامصر واحلف بسماها وبترابها " العسكر هو اللي
خربها " .. تعالي نرقص الرقصة اللي انت عايزها .. عشرة بلدي .. تانجو .. ولا ندّيها دينا وفيفي عبده .. ولا إيه رأيك في سحر حمدي بتاعت زمان .. ونغني زي الراجل " الاقرع " اللي كان ملازمها : تعبتني ياغزال .. اجي يمين تيجي شمال.. وانا كنت بحب المشمش دلوقتي بموت
في المانجه .. المانجه ..المانجه.

تعالى نرقص .. وسيبنا بعد كده احنا لامؤاخذة " نتعولق " .. مادام حارقص معاك على جثث عيالنا وعلى مستقبل بلد .. يبقى احنا لامؤاخذة " علوق " واللي يعمل ضهره قنطرة .. يستاهل الركوب ، والضرب بالجزمة القديمة!!!