أحمد عفيفي يكتب: « كتاب » حياتي يا عين ماشفت زيه « كتاب »

الفرح فيه دقيقتين والباقي كله عذاب!!
كان فيه زمان أغنية حلوة اوي كنت بعشقها.. من أغاني الأفراح أيام الروقان والناس الطيبين .. واحدة بتغني لعروسة ابنها وبتقول لها : كتبوا " كتابك " يا نقاوة عيني .. يوم الهنا .. ياحلوة يوم ما " تيجيني " .. ابني الوحيد ع العز انا ربيته .. حبّيه ياغالية أد ما حبيته .. هنّي حياته وعمّري له بيته .,. يسعد بقربك يا نقاوة عيني.

جات على بالي الأغنية دي بعد ماشفت المتخلف ابن المتخلف اللي اسمه رضا المصري واللي عمل كتاب عن انجازات الرئيس مرسي في 9 شهور .. ومش عارف ليه بعد 9 شهور تحديدا ، وهى فترة الحمل المعروفة .. عايز مثلا يقول لنا .. هذا ما " أنجبه " لنا الدكتور مرسي .. بعد معاناة شديدة وآلام مبرحة كادت تعصف بالجنين لولا صمود الرجل وتحديه ليخرج مولوده إلى الحياة.. ولا الكتاب ده أساسا ألفته الست أم مرسي تعدد فيه مزاياه للعروسة اللي اختارتها بنفسها لإغرائها بقبوله والحفاظ عليه ، وتحطه في عنيها .. وتحبه أد ما هى حبّته زي الاغنية ما بتقول؟ .. لو المسألة كده .. ماشي .. وممكن تبقى فكرة ونعمّمها .. اللي عايز يتجوز يشوف حد يكتب عنه كتاب ويديله قرشين ويقدمه لأهل العروسة .. وهو ونصيبه بقى .. أو هو وشطارة اللي بيكتب .. إما العروسة تقبله .. وإما " تتف " في وشه هو واللي كتب له هذا الكتاب!

الموضوع ده كان موضوع برامج التوك شو امبارح .. منى الشاذلي ويوسف الحسيني ومحمود سعد وابراهيم عيسى .. بس اللي شدني أوي برنامج منى الشاذلي وكانت جايبة الصحفي الجميل حلمي النمنم ، وواحد " قفا " من جماعة الحرية والعدالة .. اسمه هاني صلاح الدين " بيطلع كل يوم مع تام رامين في ساعة مصرية " .. منى الشاذلي ماسكة نفسها بالعافية وهى بتقرا انجازات الرئيس .. عايزة تضحك ومش قادرة .. " ابراهيم عيسى ومحمود سعد عملوها .. مقدروش يمسكوا نفسهم من الضحك " .. اللي ضحك اوي اوي لدرجة ان دموعه نزلت حلمي النمنم .. و" القفا " اللي قاعد جنبه بيدافع عن الكتاب .. واللي كتب الكتاب .. واللي الكتاب مكتوب عنه .. والله العظيم لو أدرك هذا القفا اللي اسمه هاني معنى ضحك النمنم ، كان قام ومشي وعينه في الأرض م الكسوف .. بتدافع عن إيه يا راجل .. انجازات إيه ونيلة إيه وهباب إيه اللي عملها مرسي .. ده بدل ما تمسك وتمسخر " المقطف " التاني اللي كتب الكتاب .. وطبعا بأوامر من الحزب ومكتب الإرشاد ومرسي نفسه .. طيب يا اخي ان كان ولابد ينكتب كتاب عن مرسي نعظّم وننفخ فيه .. نجيب بقى حد حريف مش أهبل .. حد فاهم مش واحد بتلات قروش .. ويضحّك بكتابته امة لا اله الا الله .. واحد بيعرف يزوّق الكلام ويعرف يعمل مقدمة حلوة تشد .. وعنوان للكتاب عام ومفتوح .. مش يكتب " مرسي يبني مصر من جديد " .. خلّيه مثلا : بعد 9 شهور.. الرئيس " يضع " قواعد النهضة .. او مثلا : ايه اللي جابه مرسي بعد 9 شهور .. أو أى عنوان مفتوح ع البحري محدش يعرف يمسك منه حاجة .. وبعدين خد القرشين بتوعك من الجماعة واتوكل على الله واستحمل كام مليون " تفة " من كل اللي يشوفك ويقابلك ويقولك يا راجل يا " عرة "!.


انا طبعا مش حتكلم عن اللي قاله الافندي المتخلف .. عشان عيب أوي اني حتى أعيده .. عامل كده زي محمد نجم وحسن عابدين بتوع الإفيه الشهير جدا " شفيق يا راجل " .. شفيق يا راجل اللي كان لمّا يعطش يشرب على طول .. شفيق يا راجل اللي لمّا الدنيا تبقى حر بيعرق ويقول " إف " من ريحة عرقه .. شفيق يا راجل اللي لمّا بيبقى مستعجل ب يمد .. واللي اول ما دماغه توجعه بياخد اسبرينة ... حاجة كده ضحكنا عليها في المسرحية .. انما تكتبها في كتاب على اعتبار أنها انجازات .. زي ما بتقول أول رئيس ب "دقن " .. يا ريته يا أخي كان من غيرها بس كان عمل حاجة واحدة بس تخلينا نصبر عليه .. لأ وشوف دي .. اول رئيس مصري يصلي الجمعة كل أسبوع في الجامع.. " هى الجمعة بتتصلى في البيت واحنا مش عارفين ؟ " .. وهاتك يا مديح في مزايا سي محمد مرسي المؤدب المتسامح واللي سلم على الضابط اللي قبض عليه .. ناقص بس يقول : عامل زي النسمة .. متسمعلوش حس من كتر أدبه .. عينه دايما في الأرض اذا شاف واحدة ست .. وبيقول للأكبر منه " يا أبيه " وان كانت ست يا " تنت " .. وميزة تانية صعب تلاقيها في اى حد .. ممكن يفضل على وضوئه من العصر لصلاة العشا .. حتى لو كان واكل محشي كرنب .. وبيحاول يمدها للفجر عشان يدخل موسوعة غينيس .. م الأخر شاب متربي مش حتلاقوا أحسن منه لبنتكم .. والله يا جماعة الكتاب ده يعمله عريس رايح يتقدم لعروسة .. وفيه كل مؤهلاته التربوية والأخلاقية .. عشان في الأخر تقبله وتحس انها أخذت عريس لقطة .. انما إش دخل كل الهرتلة دي بمقام رئيس الجمهورية اللي مرسي نزل به لسابع ارض.


عموما " المقطف " اللي كتب الكتاب ده .. عايز لا مؤاخذة " قلمين " على قفاه .. وشلوتين على " ... " .. وكام صباع من " الصوابع " اللي بيقول عليها مرسي يلعبوا في اى حتة تعجبه وتيجي على هواه! .. وان كان مزنوق أوي وغاوي شهرة ولزمن ولابد يكتب كتاب عن مرسي فكان حتما عليه يخلي عنوانه عشان يبقى موضوعي ويوزع 90 مليون نسخة : كتاب حياتي يا عين ما شفت زيّه كتاب .. الفرح فيه سطرين والباقي كله عذاب .. وأسفل العنوان الكبير يكتب .. بتوقيع الشعب المصري بعد ثورة يناير اللي جابت مرسي .. وان شاء الله زي ما جابته .. زي ما حتشيله .. وترميه في السجن.