كبدة بانيه وكنافة مقلية بالفواكه في عزومة 13 رمضان

أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ماتتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور..
على سفرة النهارده هيكون موجود عصير القراصيا وسلطة الطماطم والزيتون وشوربة الفراخ بالكريمة والفريك وكبدة بانيه وكنافة مقلية بالفواكه، وعلى السحور هنقدّم لك كلوب ساندوتش..

عصير القراصيا
عصير القراصيا
المقادير:
كوب قراصيا منزوعة النوى ومنقوعة في ماء مع ملعقة صغيرة ماء ورد
3 كوب ماء (حسب الحاجة)
سكر (حسب الرغبة)
الطريقة:
1- انقعي القراصيا في كمية مناسبة من الميه، لغاية ما تحسّي إنها بقت طرية، وبعد كده اغليها على النار بعد إضافة السكر، وسيبيها لمدة 30 دقيقة مع التقليب المستمر.
2- ارفعي القراصيا من على النار، وسيبيها على جنب تبرد شوية، وبعد كده اضربيها في الخلاط، وبعدين صفّي العصير كويس، وصبيه في الكاسات وقدّميه.

سلطة الطماطم والزيتون
سلطة الطماطم والزيتون
المقادير:
1⁄2 كيلو طماطم مقطّعة مكعبات صغيرة
1⁄2 كوب زيتون أسود مقطّع شرائح
1⁄2 كوب زيتون أخضر مقطّع شرائح
بصلة متوسطة مقطعة شرائح
ملعقة صغيرة عصير ليمون
ملعقة كبيرة كزبرة مفرومة
ملعقة صغيرة ثوم مفروم
ملعقة كبيرة زيت زيتون
ملعقة صغيرة كمون
ملح
الطريقة:
1- سخّنى زيت الزيتون وشوّحي فيه البصل والزيتون الأسود والأخضر.
2- ارفعي الخليط من على النار وحطيه في طبق التقديم وضيفي عليه الطماطم وعصير الليمون والملح والكمون والثوم والكزبرة وقلبيهم مع بعض وقدّميه.

شوربة الفراخ بالكريمة والفريك
شوربة الفراخ بالكريمة والفريك
المقادير:
1⁄4 كيلو فريك
2 شريحة فراخ بانيه مقطّعة مكعبات صغيرة
1⁄2 ثمرة بصل مقطّعة قطع صغيرة
ملعقة كبيرة زيت نباتي
4 كوب شوربة فراخ
كوب كريمة لباني
ملح وفلفل
الطريقة:
1- سخني الزيت في حلة على النار وبعد كده شوّحي فيه الفراخ لغاية ما لونها يبقى دهبي، وبعد كده ضيفي عليها البصل وشوّحيهم مع بعض لغاية ما البصل يذبل.
2- ضيفي الفريك على خليط البصل والفراخ وقلّبيهم مع بعض لمدة دقيقة، وبعد كده ضيفي شوربة الفراخ والكريمة اللبّاني، وقلّبيهم مع بعض، وبعد كده غطّي الحلة وسيبي الشوربة تغلي على نار هادية لمدة 15 دقيقة.
3- ارفعي الشوربة من على النار، واغرفيها في أطباق التقديم وممكن تزيّنيها بالبقدونس المفروم.

كبدة بانيه
كبدة بانيه
المقادير:
3⁄4 كيلو كبدة مقطعة شرائح
3 فص ثوم كبير مفروم
1⁄4 ملعقة صغيرة بهارات
1⁄4 ملعقة صغيرة قرفة
ملح وفلفل أسود
عصير 2 ليمونة
كوب بقسماط
2 بيضة
الطريقة:
1- اخلطي كل المقادير -ما عدا البيض والبقسماط- مع بعض وتبّلي فيهم الكبدة، وسيبيها في الثلاجة من 3 : 4 ساعات.
2- اخفقي البيض مع شوية ملح وفلفل وحطّي فيها شرائح الكبدة وبعد كده غلفيها بالبقسماط وبعدين دخّليها في الفريزر لمدة 15 دقيقة.
3- سخني زيت غزير واقلي فيه الكبدة وبعد كده طلعيها ورصيها في طبق التقديم وزينيها بالبقدونس المفروم، وممكن تعملي معاها مكرونة أو بطاطس محمرة.

كنافة مقلية بالفواكه
كنافة مقلية بالفواكه
المقادير:
1⁄2 كيلو كنافة
1⁄4 كيلو زبدة
2 كوب سكر
2 كوب ماء
2 ثمرة مانجو
5 ثمرة موز
عصير ليمونة
1⁄4 كوب لوز مقشر (أوي أي مكسرات عندك)
1⁄4 كوب جوز هند
الطريقة:
1- لتحضير الشربات، ضيفي الميه مع السكر والليمون في حلة على النار وسيبيه لغاية ما يبقى قوامه سميك، وبعد كده ضيفي عليه الفانيليا.
2- حطّي الكنافة في الفريزر علشان تجمد وبعدين طلّعيها وقطعيها بحيث تكون مفتتة.
3- سيّحي 5 ملعقة كبيرة زبدة في طاسة وحمّري فيها نصف كمية الكنافة وبعدين افرديها في صينية مش مدهونة.
4- قطّعي الفواكه واخلطيها مع اللوز وجوز الهند، وافردي الخليط ده على الكنافة اللي في الصينية.
5- حمّري نص الكنافة التاني وافرديها فوق الفواكه وبعد كده اسقي صينيه الكنافة بالشربات ودخليها في الفريزر شوية علشان تتماسك، وبعد كده طلّعيها وقطّعيها، وزيّنيها بالكريم شانتيه وقدّميها باردة.

كلوب ساندويتش
كلوب ساندويتش
المقادير:
15 شريحة توست
2 ثمرة طماطم مقطّعة شرائح
4 ثمرة خيار مقطّعة شرائح
5 شريحة لانشون فراخ أو هامبورجر
4 ملعقة كبيرة مايونيز
5 شريحة جبنة شيدر
4 بيضة مسلوقة
الطريقة:
1- حمّصي التوست في الشواية لغاية لونه ما يبقى دهبي.
2- اهرسي البيض واخلطيه مع المايونيز وافردي الخليط ده على 1⁄2 شرائح التوست.
3- افردي كمية من خليط البيض على 5 شرائح توست، وبعد كده افردي على كل شريحة توست قطعة من اللانشون أو الهامبورجر، وبعد كده غطّي كل شريحة توست بقطعة تانية.
4- رصّي شريحة خيار وشريحة طماطم على كل ساندوتش، وبعد كده افردي عليهم كمية مناسبة من خليط البيض والمايونيزن وبعد كده حطّي شريحة من الجبنة الشيدر، وفي النهاية غطّي الساندوتش بآخر طبقة من التوست، واضغطي على الساندوتشات بإيدك كويس، وقطّعي كل ساندوتش إلى 4 مثلثات، وثبّتي كل مثلث بعود خشبي (خلة الأسنان)، وممكن تقدّميها مع سلطة زبادي بالخيار.
وبكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكرة إن شاء الله مع عزومة جديدة..
نتمنى لكم صوما مقبولا وإفطارا شهيا بمشيئة الله..
سلام،،،