شرائح الفراخ بصوص الفلفل الأحمر

النهارده هنعمل الفراخ بطريقة جديدة وشهية جدا، جرّبيها معانا على "سفرة دايمة" وابعتي قولي لنا رأيك فيها..
شرائح الفراخ بصوص الفلفل الأحمر
المقادير:
1⁄2 كيلو فراخ بانيه مقطعة شرائح
ثمرة فلفل أحمر باردة كبيرة ومفرومة
ثمرة فلفل أخضر حار مقطّعة شرائح
ثمرة فلفل أحمر حار مقطّعة شرائح
ثمرة بصل كبيرة ومقطّعة شرائح
2 ملعقة كبيرة عصير ليمون
1⁄4 كوب صلصة طماطم
1⁄4 كوب أوراق بقدونس
2 ملعقة صغيرة نشا
كوب شوربة فراخ
2 فص ثوم
ملح وفلفل
زيت زيتون
الطريقة:
1- اخلطي الفراخ مع الثوم وعصير الليمون وصلصة الطماطم والفلفل الأحمر الحار والفلفل الأخضر الحار والملح والفلفل، وحطّي الفراخ مع التتبيلة دي في الثلاجة لمدة ليلة كاملة أو ممكن تستخدميها بعد 4 ساعات لو كنتي مستعجلة.
2- هاتي طاسة كبيرة، وحطّي فيها كمية مناسبة من الزيت وشوّحي فيها الفراخ مع التتبيلة بتاعتها لغاية ما لون الفراخ يبقى مائل للبني، وبعد كده ارفعي الفراخ من الطاسة.
3- بعد كده حطّي كمية تانية من الزيت في نفس الطاسة، وشوّحي فيه البصل والفلفل الأحمر البارد المفروم لغاية ما البصل يبقى طري، وبعد كده حطّي الفراخ مرة تانية في الطاسة وضيفي معاها النشا بعد ما تدوّبيها في شوربة الفراخ.
4- قلّبي الخليط مع بعضه على النار لغاية ما يغلي وكثافته تزيد والفراخ تستوي تماما، وفي الآخر حطّي البقدونس الأخضر وقلّبيهم مع بعض على النار، وبعد كده اغرفي الفراخ في طبق التقديم.. وبالهنا والشفا.
وبكده تكون خلصت وصفتنا النهاره..
استنونا بكره في وصفة جديدة..
سلام،،،