أرجوك اديني رأيك: بحب خطيبي.. بس حبيبي صعبان عليّ

الأول باشكركم على الموقع لأنه بجد جميل جدا.. أنا عندي 24 سنة والحمد الله على قدر من الجمال، وخلصت حقوق، مشكلتي إن في سنة أولى حبيت واحد زميلي، وكنت أول مرة أحب، كنت بحبه بجنون لدرجة إني ضيعته.. اتّغر من كتر الحب اللي اديته ليه.
اتغير عليّ وبِعِد عني مع أول مشكلة صغيرة، وعلى قد ما كنت فرحانة وطايرة بحبه على قد الحزن اللي حسيت بيه في بعده عني، وبعدت وعمري ما نسيته، وبعد كده حاول يرجع لي بس أنا حسيت إني اتجرحت وماعرفتش أسامح، بس باطّمن عليه من ناس أصحابنا من وقت للتاني من غير ما يعرف.
لما خلصت دراسة خلصت حجتي في رفض أي حد يتقدم لي من غير سبب، وصراحة أهلي عمرهم ما فرضوا عليّ حد، اتعرفت على واحد كنت باخد معاه كورس إنجليزي وهو كان بيحبني أوي، واتقدم لي ولقيت فيه كل شيء كويس.. إنسان محترم بكل معاني الكلمة، بيحاول يسعدني بكل طريقة، واتخطبت له فعلا.
المشكلة إن زميلي اتّصل بيّ وقال لي إنه بيحبني ومش قادر ينساني، وطبعا أنا قفلت وقلت له إني خلاص نسيت كل حاجة، أنا عرفت من أصحابنا إنه بجد تعبان مش عارف ينساني، ومش بيحاول يرتبط ويقرب من أي بنت وأنا بجد حاسة إني مش عارفة أعمل إيه، أنا تعبانه بس أعمل إيه؟ هو صعبان عليّ وبجد أنا عمري ما هانساه بس هو بالنسبة لي ذكرى..
أرجوك اديني رأيك..
Leila1
لو عايز تفضفض لنا دوس هنا