السلام عليكم ورحمة الله وبركاته.. أنا شاب في ال23 من عمري، أنا واقع في مشكلة جامدة جدا ومش عارف أعمل فيها إيه، أو بمعنى أصح مش عارف أتجنب المشكلة دي إزاي؛ لأنه لو حصلت مشكلة هتبقى بسببي أنا. الحكاية مع واحدة جارتي.. من ساعة وجودنا في الدنيا وإحنا عارفين بعض، بس ماكانش لينا كلام أو أي حب بينا وبين بعض، بس أتوجد الكلام بيننا من سنة تقريبا، واقتربت لها أوي في الفترة دي، وعرفت عنها كل حاجة وهي برضه عرفت عني كل حاجة، وأنا مش عايز أكدب، أنا بصراحة اتشديت ليها بس مش أوي برضه. المهم حسيت فيها ومن طريقة كلامها إنها بتحاول تقرب مني أوي؛ لدرجة إني حسيت إن ده حب منها ليّ؛ لأني كنت لما آجي أكلمها على أي بنت من الشارع إني مشدود لها أو أي حاجة من الحاجات دي كانت تطلع فيها كل حاجة مش كويسة، لدرجة إنها كانت بنت شيخ صاحب مسجد في المنطقة قالت دي كانت تعرف.. وتعرف... وكانت سيئة السُمعة على الآخر، وبنات كتير بنفس الطريقة دي. في مرة والدتي عرفت إن إحنا بنكلم بعض، وأمي كانت معجبة بها، فحاولت تقرب المسافات، وكلمت والدتها من غير ما تاخد رأيي، فأنا حاولت أساير الأمور؛ بالرغم من عدم موافقتي على اللي عملته والدتي وتصرفها من غير معرفة رأيي فيها. كلمت جارتي دي في مرة طلبت إني أشوفها فوافقت وكانت سعيدة جدا بالمقابلة دي وضحكنا واتكلمنا في كل حاجة، الأمور اتغيرت تماما من بعد المقابلة دي بقيت أحاول أوصل لها، مابقيتش أعرف مع إنها ساكنة في الدور اللي فوقنا، وبقيت بافكر في كلمة اتقالت بيننا في المقابلة، مالقيتش فيها ولا غلطة، بالعكس ده أنا كنت باتكلم معاها بكل عقل ووعي. وصل بيّ الموضوع للجنون؛ إني بقى لازم أعرف في إيه؟!! ناديت عليها أكتر من مرة، وكأنها مش سامعاني، وأديها في أعذار، ومرة واحدة عرفت إنها اتقرأت فاتحتها على حد تاني من الشارع برضه واتخطبت، ويوم الخطوبة ماكنتش موجود منعا لحصول أي مشكلات، وكل يوم حاجة جديدة تحصل بينهم، وبيبقى قدام عينيا وأنا خلاص مُنهار، تعبت.. ده غير نظرة الناس كلها ليّ؛ نظرة الشفقة على حالي عشان بنت رمتني.. أنا عايز أهرب من اللي أنا فيه ده، مش عارف أنا تعبان أوي.. يا ريت الرد يكون في أقرب وقت، وآسف على الإطالة. ahmedhota