أنا بنت عندي 18 سنة، وكنت بحب ابن خالتي، وهو أكبر مني ب5 سنين، وقصة حبنا دي كانت من حوالي 3 سنين. كنت بحبه أوي، وهو كمان كان بيحبني؛ بس بعد فترة بدأ يتغير؛ يعني ما عادش بيهتم بيّ زي الأول، وما عادش بيقول لي كلام حلو، وكل حاجة عايز رأيه نافذ فيها. أنا ما باحسّش بالحب من جهة والدته وإخواته؛ بس كنت عادي ومش باحطّ في دماغي.. ومرة من المرات اللي كان بيزعلني فيها اتشديت لواحد تاني لقيته بيديني كل اللي مش لاقياه في حبيبي من حب واهتمام وكل حاجة. المشكلة دلوقتي في التاني؛ لأن فيه صفات كتيرة مش حلوة؛ زي إنه بيشرب مخدرات، وله علاقات كتيرة مع بنات؛ بس بيقول لي: أنا بحبك.. وهاتغيّر عشانك!! أنا بقيت باحسّ إني بحبه، وما عدتش باحسّ بأي شعور ناحية حبيبي الأولاني وعايزة أسيبه؛ بس خايفة ربنا يعاقبني لأنه فيه صفات كتير حلوة.. كمان مش قادرة أسيبه عشان مش أجرحه. أنا دلوقتي في حيرة.. اختار اللي قلبي بيحبه، ولا اللي فيه الصفات الكويسة وما عدتش باحسّ حاجة معاه؟.. أرجو الإفادة وشكراً لموقع "بص وطل" على إنه فتح لنا باب الفضفضة.