حبكَ ليس ضعفاً.. وممكن تكلّمها مرة تانية أخيرة

السلام عليكم.. في الأوّل أنا مش عارف أقول إيه.. بس أنا تَعبان، ومش عارف أعالج نفسي، ومرضي هو الحب، باختصار أنا حبيت واحدة كان ليها تجارب فاشلة قبلي، ومش عارفة تتخلّص منها، وعارف إني فرضت نفسي بحبي ليها، ولما أقول لها أنا عارف إني فرضت نفسي عليكِ؟!! كانت تقول لأ!! وكانت بتقول لي بحبك، أنا كنت باحسها، بس مش عارف هي عملت حادثة، واتغيّرت معايا من ساعتها، بس مش عارف أنا حاسس إن حد تاني دخل حياتها أو حبها، أنا صراحة أنا ما ارتحتش قمت قافل الموضوع معاها، وقلت لها إديني فرصة أطمن عليكِ.
وبعدت عنها فترة، ورجعت أكلمها، بس على فترات قريّبة، أنا كمان كنت مرتبط قبلها، وما كنتش مرتاح في ارتباطي ده؛ لأني ما كنتش بحب اللي مرتبط بيها، المهم في آخر مكالمة كلمتها، وحكيت لها عن موقف حصلي إن اللي كنت مرتبط بيها قبلها طلبت تقابلني وقابلتها، وقالت لي: إن فيه شخص متقدّم لها، وعايز يرتبط بيها، بس هي عايزاني أنا، أنا مقدرتش أقول آه؛ لأن أنا ما بحبهاش، ولما كلمتها حكيت لها على الموقف ده، وسألتني هتعمل إيه؟!! قلت لها عادي هرتاح شوية، بس أنا مش قادر أرتاح من غيرها، شفت كتير وعرفت بنات كتير، مش قادر أحس تجاه أي واحدة فيهم بحاجة، أنا في معاملتي مع الكل بابقى شديد شوية في المعاملة، ومن الصعب إني أظهر مشاعري إلا مع اللي أنا بحبها علشان بابقى ضعيف معاها أوي، وده شيء تعبني؛ لأني ما بحبش الضعف، دي حاجة.. والحاجة التانية: إني مش متأكد من مشاعرها؛ حاسس إني اتغيّرت، أنا فكّرت إني أصارحها إني لسه بحبها، بس مش عايز أتجرّح تاني، أنا آسف إني طوّلت عليكم بس كان نفسي أفضفض مع حد.
mido

لو عايز تفضفض لنا دووس هنا