كنت بحبه.. ودلوقتي مش طايقاه

أنا عندي 18 سنة، ومن 4 سنين اتعرفت على واحد وكنا أصدقاء، والصداقة تحوّلت لحب، وهو بجد بقى بيحبني جدا، وعمره ما رفض لي طلب.
واتخطبنا؛ لكن بدأت أتغير من ناحيته؛ لأنه ابتدى يتنازل لأهله عن حاجات ملكنا؛ زي الفلوس اللي هيكوّن بيها نفسه.. ومامته بتستغله جامد جدا، وهو وحيد ومتربي بعيد عن باباه، وعاش مع مامته.
أنا بحبه بجد، بس مش عايزة أعيش معاه، بجد زهقت وتعبت، أنا مش ضد إن هو يساند مامته؛ بس مامته وحشة جدا؛ بتحاول تستحوذ على كل فلوسه، وبتحاول تورّطه في مشكلات، وعمرها ما وقفت جنبه.. وكانت تعمل قروض وتخليه يضمنها وماتدفعش؛ عشان يضطر هو يدفع ده، بدل ما تقف جنبه وتساعده، وبتخليني أنا اللي أضطر أقف معاه.
وعرفت حاجات عن أهله وحشة جدا من ناحية السمعة، ومارتحتش إني أكون بينهم، أنا عارفة إني هاظلمه لو سبته بس لازم أسيبه؛ لأن لو أهلي عرفوا عن أهله حاجة هيغصبوا عليّ، وهيخلوني أسيبه.
أنا مابقيتش بارتاح معاه، ولا بقيت مشتاقة إنه يشاركني حياتي.. مش عارفة ده خوف ولا ظلم؟
أنا بالنسبة له فرحته، وأنا الشيء اللي بيضحكه ويبكيه؛ بس لازم أبعد.. هو صعبان عليّ أوي أوي بجد، وربنا يسامحني لو كنت فعلا هاظلمه؛ بس بجد أنا أخدت القرار، وكل ما أتفق معاه إننا هنسيب بعض مايرضاش.
بس أنا مش مرتاحة وأنا معاه، أنا باعزه جدا، وباحس إني باموّته بإيدي؛ بس مش عارفة أعمل إيه؟ بجد أنا عايزة الحل عشان أرتاح.. أنا ماليش حد بيسمعني ولا حد يشاركني اللي أنا فيه.. أتمنى إني ألاقي رد.
nour

لو عايز تفضفض لنا دوس هنا