أنا مش عارفة أبدأ منين.. أنا متلخبطة ونفسيتي مدمّرة، أنا عارفة إني غلطانة بس مش عارفة أعمل إيه؛ مشكلتي باختصار إني من 4 سنين اتعرّفت على شاب كان معجب بيّ، بس أنا ماكنتش حاسة باعجاب ليه.. كان عادي، ومرت مدة وفعلا حبيته، مع العلم إنه لسه ماكانش جاهز يخطبني رسمي. بعد فترة بدأ يتقدّم لي عرسان كتير ومعظمهم مايترفضوش؛ من حيث الأخلاق والمستقبل، أو أي حاجة تتمناها البنات، ورفضت كتير ومش ندمانة والله عليهم، أنا مش عايزة غير اللي بحبه. لكن مع الأسف حصلت مشكلات بيننا، ولما كنت أسأله إنت عايزني؟!! كان يقول لي: "ده نصيب".. هنا بقى اتقدم لي واحد ماعرفتش أرفض؛ لأن السبب اللي كان بيقوّيني إن حبيبي بقى بعيد عني. وافقت واتخطبت لمدة 6 شهور مش فاكرة منهم غير هَمّ وحزن ونكد وحالة نفسية سيئة، لدرجة إني كان بيغمى عليّ فكنت باقول ضغط امتحانات، بس كنت باضحك على نفسي، لما كنت بابقى قاعدة مع خطيبي (أو اللي كان خطيبي) كنت بابقى شايفة حبيبي لدرجة إني بجد اتخنقت، وحسيت إني كده خاينة، وماترددتش وفسخت الخطوبة، والحمد لله ما أظنش إني كنت فارقة مع خطيبي أصلا؛ لأني ماحسيتش إنه بيحبني، يعني ماظلمتوش. ورجعت تاني لحبيبي، وأنا عارفة إني جارحاه، وأول ما اتكلمنا تاني حبيت إني أفتح موضوع الخطوبة، قال لي: "لأ ننسى اللي فات ونقفله"، وبدأنا من جديد، وخلاص كلها كام شهر وهيتقدم لي إن شاء الله. المشكلة إن موضوع الخطوبة ده وارد في أي خناقة بيننا مهما كانت الخناقة تافهة بيفضل يفكّرني بالخطوبة، أنا هاموت من الإحساس بالذنب؛ إزاي هاتخطب له وأنا عملت فيه كده؟!! وفي نفس الوقت مش عارفة أعمل إيه عشان ينسى؟ والله تعبانة، أنا بحبه بجد، ومش متخيلة إني أتجوز غيره، ومتأكدة إنه بيحبني زي ما أنا بحبه ويمكن أكتر، أنا عايزة أنسّيه خطوبتي بس مش عارفة إزاي؟؟ أرجوكم ردوا عليّ بسرعة. dodo