لحمة بصوص التفاح على "سفرة دايمة"

النهارده هنعمل مع بعض طريقة جديدة للحمة بصوص التفاح، جرّبيها معانا وقولي لنا رأيك فيها..
لحمة بصوص التفاح
المقادير:
6 شرائح لحمة
2 كوب عصير تفاح
ملعقة صغيرة روزماري مفروم
2ملعقة صغيرة مستردة
3 فص ثوم مفروم
1⁄4 كوب خل تفاح
ملعقة كبيرة زيت
ملعقة كبيرة زبدة
ملح وفلفل أسود
رشّة شطة
الطريقة:
1- تبّلي شرائح اللحمة بالملح والفلفل الأسود، وبعدين اخلطي الزيت مع الزبدة في طاسة على النار، وسيبيهم لغاية ما الزبدة تسيح، وبعدين ضيفي اللحمة وشوّحيها من الناحيتين لغاية ما اللحمة تستوي، وبعد كده شيلي اللحمة من الطاسة وحطّيها على جنب.
2- حطي الثوم في الطاسة اللي حمّرتي فيها اللحمة على النار وقلّبيه لمدة 30 ثانية، وبعدين ضيفي عليه الخل وعصير التفاح والمستردة وقلّبيهم مع بعض، وسيبي الخليط على النار لحد ما الصوص يقل ويبقى قوامه كثيف.
3- ضيفي على الخليط الروزماري والشطة وقلّبيهم على نار هادية لمدة دقيقتين وممكن تزوّدي ملح لو حسّيتي إنه محتاج، وبعدين ضيفي اللحمة وسيبيها لمدة دقيقتين لكل ناحية علشان تتشرب الصوص، وقدّميها.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،