ورينا شطارتك

لو كنتم بتحبوا تطبخوا وتجربوا أكلات جديدة من مطابخ مختلفة في العالم..
لو كان عندكم خبرة كبيرة في الأكل..

وعايزين كل أصدقاء "بص وطل" يستفيدوا منها..
تقدروا تبعتوا لنا هنا كل الوصفات الجامدة اللي جربتوها قبل كده..
وإحنا هننشرها على باب "سفرة دايمة" باسمكم..
ودي وصفة وصلت لنا من صديقتنا العزيزة "نانسي" وهي..
طريقة عمل الحواوشي
أهلاً بكل أصدقاء "بص وطل"، وميرسي لكل فريق عمل "سفرة دايمة" إنكم أتحتم لنا الفرصة إننا نتشارك معاكم، أنا حبيت أشترك معاكم بطريقة عمل الحواوشي..
طريقة عمل الحواوشي
المكوّنات:
10 رغيف خبز بلدي
كيلو لحمة مفرومة
3 بصلات متوسّطة الحجم
فلفل رومي
فلفل حار
بهارات وفلفل أسود (حسب الرغبة)
ملعقة سمنة
ملح
كزبرة ناشفة
طريقة التحضير:
1- أحضري إناء واسعاً، وضعي اللحم المفروم والبهارات، وقطعي الفلفل، وضيفي عليهم البصل (بعد ما تبشريه) والملح والسمن، وقلّبيهم جيداً.
2- بعد كده أحضري العيش وقسمي كل رغيف نصفين، وابدئي احشي كل رغيف بكمية مناسبة من الخليط السابق، وادهني كل رغيف بسمنة من على الوش.
3- أحضري ورق زبدة ولفي الحواوشي كويس، ودخليه الفرن في درجة حرارة مناسبة، وتابعيه طبعاً لحد ما يبدأ لحد ما يستوي، وهتلاقي الورق بيبدأ في الاحمرار.
4- بعد كده طلعيه من الفرن، وقدّميه بقى مع سلطة الطحينة والسلطة الخضراء.. وبالهنا والشفا
وأتمنى أكون قلت أي معلومة حتى لو كانت بسيطة، سلام..

وفي النهاية نحب نشكر صديقتنا العزيزة على الوصفة الجميلة دي..
ونتمنى إنكم تجرّبوها وتعجبكم..
وتبعتوا تقولوا لنا رأيكم إيه..
ولسه مستنيين وصفاتكم الجامدة جداً..