الصديقة هبه.. هتقدّم لنا طريقة عمل النجرسكو

أعدّها لكم: هبه - من وصفات القراء
النهارده حبّيت أشارك معاكم بطريقة عمل النجرسكو، لأن ده أكتر طبق أنا بحب أعمله، وكل عيلتي بتقول إن طعمه بيبقى تحفة، يا ريت تجرّبوه على طريقتي وتبعتوا تقولوا لي رأيكم..

نجرسكو
المقادير:
1⁄2 كيلو مكرونة أقلام مسلوقة
ثمرة فلفل رومي مقطّعة شرائح رفيعة
1⁄2 كيلو صدور فراخ
ملعقة كبيرة زبدة
جبنة موتزاريلّا
مقادير البشاميل:
2 كوب لبن
2 ملعقة زبدة
2 ملعقة دقيق
ملح وفلفل
بيضة
الطريقة:
1- قطّعي الفراخ شرائح صغيرة، وشّوحيها مع الزبدة والفلفل الرومي، لغاية ما تستوي.
2- لتحضير البشاميل، حمّري الدقيق في الزبدة، لغاية ما يبقى لونه دهبي، وبعد كده ضيفي اللبن مع التقليب السريع والمستمر، علشان الخليط ما يكلكعش منك، واستمري في التقليب على نار هادية لغاية ما تحصلي على خليط متماسك وكثيف بالسُمك اللي إنتِ عايزاه، ولو حسّيتي إنه تقيل ممكن تزوّديه شوية لبن أو شوربة.
3- بعد كده ارفعي البشاميل من على النار وسيبيه يهدى شويه.
4- اخلطي المكرونة مع الفراخ، ونصف كمية البشاميل، وقلّبيهم مع بعض كويس، وحطّيهم في صينية الفرن.
5- اخلطي باقي البشاميل مع البيضة اللي عندك، وتبّليه بالملح والفلفل، وصبّيه على المكرونة، وعلى الوش حطّي الجبنة الموتزاريلا أو الرومي، ودخّلي الصينية في الفرن، وسيبيها لغاية ما الوش يحمرّ، وبعد كده طلّعيها.

وبكده تكون خلصت وصفتنا النهارده..استنونا بكره مع وصفة جديدة..
يا ريت تجرّبوها وتبعتوا لنا تقولوا لنا على اقتراحاتكم..
ولو عايزين تشاركونا بوصفاتكم المميزة.. ابعتوا هنا