كريب محشي بالجمبري وصوص البشاميل

اعدّها لكم: أميرة هيبه
النهارده هنقدّم طريقة الكريب بالجمبري بناء على طلب أصدقائنا الأعزاء، اللي كانوا عايزين يجدّدوا في الطريقة اللي بيقدّموا بها الجمبري..
كريب محشي بالجمبري وصوص البشاميل
مقادير عجينة الكريب:
* 1⁄2 كوب دقيق (طحين)
* 1⁄4 كوب زبدة سايحة
* ملعقة صغيرة زبدة
* 2 حبة بيض
* 2 كوب لبن
* رشة ملح
مقادير الحشو:
1⁄4 كيلو جمبري مسلوق
1⁄2 ثمرة فلفل مقطّعة شرائح (أي لون تحبّيه)
بصلة متوسطة مقطّعة شرائح
2 ملعقة كبيرة عصير ليمون
1⁄2 كوب زيتون مقطّع شرائح
2 ملعقة كبيرة بقدونس مفروم
2 ملعقة كبيرة زبدة
2 فص ثوم مفروم
ملح وفلفل
مقادير صوص البشاميل:
1⁄2 كيلو لبن
ملح وفلفل أبيض
فص ثوم مفروم
2 ملعقة كبيرة زبدة
2 ملعقة كبيرة دقيق
جبنة رومي أو شيدر
الطريقة:
1- لتحضير الكريب؛ اخلطي الدقيق والملح والسكر مع بعض، وبعد كده صبّي عليهم اللبن والبيض والزبدة، وقلّبيهم كويس مع بعض بإيدك أو باستخدام الخلاط الكهربائي، وهتلاقي إن العجينة سائلة شوية، وبعد كده سيبيها شوية علشان ترتاح قبل ما تستخدميها.
2- هاتي طاسة تيفال، وادهنيها بكمية صغيرة جدا من الزبدة، وبعد كده صبّي فيها كمية مناسبة من عجينة الكريب، وسيبيها شوية على نار هادية علشان تستوي، وبعد كده اقلبيها على الوش التاني لحد لونها ما يبقى دهبي فاتح، وبعد كده ارفعيها في طبق وسيبيها تبرد، وكرري نفس الخطوة أكتر من مرة لغاية ما كمية العجينة اللي عندك تخلص.
3- لتحضير الحشو؛ دوّبي الزبدة في حلة، وشوّحي فيها البصل والثوم لحد ما يدبلوا ولونهم يبقى أصفر، وبعد كده ضيفي عليهم الجمبري المسلوق وقلّبيهم مع بعض، وفي الآخر ضيفي البقدونس والفلفل الملون والزيتون والملح والفلفل وعصير الليمون.
4- لتحضير البشاميل؛ دوّبي الزبدة على النار، وضيفي معاها الدقيق وقلّبيه مع الزبدة شوية على النار لغاية ما يبقى لونه دهبي، وبعد كده ضيفي اللبن، مع الاستمرار في التقليب علشان الخليط ما يكلكعش، ولما الخليط يوصل للسُمك اللي إنتي عايزاه تبّليه بالملح والفلفل وبعد كده ارفعي الخليط من على النار، وضيفي عليه البقدونس والجبنة.
5- بعد كده احشي كل قطعة كريب بملعقة كبيرة من حشو الجمبري، ولفّيه وحطّيه في صينية مدهونة زبدة، وبعد كده وزّعي البشاميل على وش الكريب، وفي الآخر حطّي شوية جبنة، ودخّلي الصينية في فرن ساخن، وسيبيها لمدة 15 : 20 دقيقة، وبعد كده طلعيها، وقدّمي الكريب وهو سخن.. وبالهنا والشفا.
وبكده تكون خلصت وصفتنا النهارده..
يا ريت تجرّبوها وتقولوا لنا على النتيجة..
واستنونا بكره مع وصفة جديدة..
سلاااااام،،،