طريقة عمل النجرسكو على "سفرة دايمة"

لكل أصدقائنا اللي طلبوا طريقة عمل النجرسكو اعمليها معانا النهارده على "سفرة دايمة" وماتنسيش تبعتي لنا رأيك فيها..

نجرسكو
المقادير:
1⁄2كيلو مكرونة أقلام مسلوقة
1⁄2كيلو صدور فراخ
جبنة موتزاريلّا
ثمرة فلفل رومي مقطّعة شرائح رفيعة
ملعقة كبيرة زبدة

مقادير البشاميل:
2 كوب لبن
2 ملعقة زبدة
2 ملعقة دقيق
ملح وفلفل
بيضة

الطريقة:
1- قطّعي الفراخ شرائح صغيرة، وشّوحيها مع الزبدة والفلفل الرومي، لغاية ما تستوي.

2- لتحضير البشاميل، حمّري الدقيق في الزبدة، لغاية ما يبقى لونه دهبي، وبعد كده ضيفي اللبن مع التقليب السريع والمستمر، علشان الخليط ما يكلكعش منك، واستمري في التقليب على نار هادية لغاية ما تحصلي على خليط متماسك وكثيف بالسُمك اللي إنتِ عايزاه، ولو حسّيتي إنه تقيل ممكن تزوّديه شوية لبن أو شوربة.

3- بعد كده ارفعي البشاميل من على النار وسيبيه يهدى شويه.

4- اخلطي المكرونة مع الفراخ، ونصف كمية البشاميل، وقلّبيهم مع بعض كويس، وحطّيهم في صينية الفرن.

5- اخلطي باقي البشاميل مع البيضة اللي عندك، وتبّليه بالملح والفلفل، وصبّيه على المكرونة، وعلى الوش حطّي الجبنة الموتزاريلا أو الرومي، ودخّلي الصينية في الفرن، وسيبيها لغاية ما الوش يحمرّ، وبعد كده طلّعيها، وممكن تقدّمي مع الطبق ده خيار مخلل .. وبالهنا والشفا.
وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت.