صينية القرنبيط بالبشاميل

النهارده هنغيّر من الطريقة التقليدية اللي بنعمل بيها القرنبيط، وهنعمله مع بعض بطريقة جديدة شوية فيها عناصر غذائية مفيدة؛ يلّا ندخل المطبخ مع بعض ونشوف طريقتنا الجديدة عبارة عن إيه...
صينية القرنبيط بالبشاميل
المقادير:
ثمرة قرنبيط
بصلة مقطّعة قطع صغيرة
1⁄2 كوب جبنة رومي مبشورة
ثمرة فلفل أخضر مقطعة قطع صغيرة
1⁄2 كيلو لحمة مفرومة
2 ملعقة كبيرة سمنة
ملعقة كبيرة كمون
ملح وفلفل أسود
2 كوب ميه
مقادير البشاميل:
3 كوب لبن
1⁄2 كوب دقيق
2 ملعقة كبيرة سمنة
مكعب مرقة دجاج
ملح وفلفل أسود
الطريقة:
1- لتجهيز البشاميل؛ سيّحي السمنة على النار وضيفي عليها الدقيق وقلّبيه لمدة 5 دقائق أو لغاية ما تلاقي إن لونه بقى دهبي، وبعد كده ضيفي عليه اللبن بالتدريج مع مراعاة التقليب المستمر علشان الخليط ما يلزقش منك أو يعمل كُتَل، واستمرّي في إضافة اللبن تدريجيا لغاية ما تحصلي على خليط يُشبه الكريمة، وبعد كده ضيفي الملح والفلفل ومكعب مرقة الدجاج وسيبي الخليط على النار لمدة 5 دقائق مع مراعاة التقليب المستمر، بعد كده اطفي البوتاجاز وسيبيه علشان يبرد.
2- عصّجي اللحمة المفرومة؛ بإنك تشوّحي البصلة الكبيرة مع السمنة على النار لمدة 5 دقائق، وبعد كده ضيفي عليها اللحمة المفرومة والملح والفلفل الأسود وقطع الفلفل الأخضر، وسيبيهم على النار لمدة نصف ساعة مع التقليب المستمر، بعد كده ضيفي عليهم نصف كوب ميه، وسيبيهم على النار لغاية ما اللحمة تتشرّب أي مية موجودة فيها.
3- اسلقي القرنبيط في ميه مضاف إليها ملعقة كبيرة كمون، وبعد كده اشطفيه كويس بميه من الحنفية وقطّعيه قطع صغيرة، وحطّيه في مصفى علشان يصفّي أي ميه موجودة فيه.
4- اخلطي قطع القرنبيط مع نصف كمية البشاميل الموجودة عندك، وبعد كده هاتي صينية بايريكس، وادهنيها بملعقة بشاميل، وابدئي في رصّ قطع القرنبيط، وبعدين غطّيها باللحمة المعصّجة، وبعد كده افردي عليها الكمية الباقية من البشاميل، وبعدين حطّي عليها الجبنة الرومي المبشورة.
5- دخّلي الصينية الفرن لمدة ساعة أو لغاية وشها ما يبقى لونه دهبي، وبعد كده خرّجيها واستني ربع ساعة، وبعد كده قطّعيها وحطّيها في أطباق التقديم.. وبالهنا والشفا.

وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااام،،،