النهارده هنقدّم لك طريقة عمل الخرشوف المحشي باللحمة المفرومة وصوص الطماطم بالريحان؛ يلا بينا على المطبخ نشوف الطريقة مع بعض... خرشوف محشي باللحمة المفرومة المقادير: * كيس خرشوف مجمّد (هتلاقيه في السوبر ماركت) * بصلة صغيرة مقطّعة قطع صغيرة لصوص الطماطم * ملعقة صغيرة توابل لحمة (هتلاقيها عند العطار) * بصلة كبيرة مقطّعة قطع صغيرة لتعصيج اللحمة * ثمرة فلفل أخضر مقطّعة قطع صغيرة * ملعقة كبيرة عصير ليمون * عود ريحان أخضر مفروم * 3 فصوص ثوم مفرومين * فنجان صغير زيت ذرة * 1⁄4 كيلو لحمة مفروم * ملعقة كبيرة سمنة * كوب عصير طماطم * ملح وفلفل أسود الطريقة: 1- اسلقي الخرشوف في شوية ميه على النار، وضيفي معاه عصير الليمون، وبعد كده ارفعيه من الميه، وحطّيه في مصفاة علشان يصفّي أي ميه موجودة فيه. 2- عصّجي اللحمة المفرومة؛ بإنك تشوّحي البصلة الكبيرة مع السمنة على النار، وبعد كده تضيفي معاها الملح والفلفل وتوابل اللحمة واللحمة المفرومة، وسيبيهم على النار لمدة نصف ساعة مع التقليب المستمر، وبعد كده ضيفي عليها نصف كوب ميه وقطع الفلفل الأخضر، وسيبيهم مع بعض على النار لغاية ما اللحمة تتشرّب أي مية موجودة فيها. 3- لتحضير صوص الطماطم، حمّري قطع البصلة الصغيرة مع شوية زيت، لغاية ما لونها يبقى دهبي، وبعد كده ضيفي عليها الثوم، وقلّبيهم مع بعض لمدة 5 دقائق، وبعدين ضيفي عليهم عصير الطماطم، وسيبيهم لغاية ما عصير الطماطم يغلي، وبعد كده قللي درجة الحرارة، وتبّلي الصوص بالملح والفلفل، وسيبيهم على نار هادية لغاية ما الطماطم تتسبّك، وقبل ما ترفعي الصوص من على النار ضيفي الريحان، وقّلبي الصوص كويس. 4- هاتي الخرشوف واحشيه باللحمة المعصّجة، ورصّيه في صينية بايركس، وعلى الوش رشّي صوص الطماطم. 5- دخّلي الصينية الفرن على درجة حرارة متوسّطة لمدة نصف ساعة، وبعد كده طلّعيها من الفرن، وطلّعي قطع الخرشوف في طبق التقديم.. وبألف هنا وشفا. بكده تكون خلصت وصفتنا النهارده.. ماتنسوش تجرّبوها وتبعتوا تقولوا لنا على النتيجة.. واستنونا بكره مع وصفة جديدة.. سلاااااااام،،،
