عزومة 21 رمضان

عصير الأناناس والفراولة بالسفن أب
العصير ده لذيذ جداً، وكمان طريقته سهلة أوي..
المقادير:
* زجاجة سفن أب
* كوب فراولة مقطعة قطعاً صغيرة
* كوب عصير أناناس
* كوب مية
* 1/4 كوب سكر
الطريقة:
اخلطي كل المقادير مع بعضها واضربيها في الخلاط، وبعد كده صبيها في كاسات العصير.

*******************
شوربة الخضار
شوربة الخضار
المقادير:
* كوب بسلة
* كوب فاصوليا خضراء مقطعة قطع صغيرة
* ثمرة بطاطس متوسطة مقطعة مكعبات
* بصلة متوسطة مفرومة
* 2 ثمرة جزر متوسطة الحجم مقطعة مكعبات
* 2 ثمرة طماطم متوسطة مقطعة مكعبات
* 2 ملعقة زيت زيتون
* 3 فصوص ثوم
* ملح وفلفل أسود
* كمون وبهارات
* مكعب مرقة دجاج
* 3 كوب ماء
الطريقة:
1- حطي الزيت في حلة على النار لغاية لما يسخن، وبعد كده حطي عليه البصلة المفرومة والثوم وقلبيهم مع بعض على النار لغاية ما تحسي إن لونهم اصفرّ.
2- ضيفي بعد كده البطاطس والجزر والبسلة والفاصوليا والطماطم وسيبيهم على نار هادية لمدة 10 دقائق مع تقليبهم كل شوية.
3- بعد كده ضيفي البهارات والفلفل الأسود والكمون والملح ومكعب مرقة الدجاج وقلبيهم كويس مع بعض.
4- بعد ما ضفتي التوابل، حطي المية بحيث إنها تزيد بشوية عن كل الخضار اللي موجود في الحلة.

5- سيبيها على نار هادية لمدة 20 دقيقة لغاية ما تتأكدي إن كل الخضار اللي موجود استوى وبعد كده حطيها في طبق التقديم.

*******************
سلطة البطاطس بالخلطة
سلطة البطاطس بالخلطة
المقادير:
* 5 ثمرات بطاطس مسلوقة ومقطعة مكعبات صغيرة
* ملح وفلفل أسود
* 1/2 حزمة بقدونس مقطعة قطعاً صغيرة
* عصير ثلاث ليمونات
* 3 ملاعق كبيرة زيت زيتون
* ملعقة كبيرة مسطردة
* ملعقة كبيرة بصل أبيض مفروم
* 5 فصوص ثوم مفرومين
* شرائح طماطم
* شرائح خيار
* شرائح زيتون أسود

الطريقة:
اخلطي جميع المقادير مع بعضها، وزيني الطبق بشرائح الطماطم والخيار والزيتون الأسود.

*******************
كباب الحلة
كباب الحلة
المقادير:
* 1/2 كيلو لحمة كندوز مقطعة مكعبات (كباب حلة)
* 3 ملاعق كبيرة زيت ذرة
* 2 ملعقة كبيرة سمنة
* بصلة مقطعة قطعاً صغيرة
* ملعقة صغيرة كركم
* 1/2 ملعقة صغيرة قرفة
* 1/2 ملعقة صغيرة حبهان مطحون
* حزمة بقدونس مقطعة قطعاً صغيرة
* عصير ليمونة
* ملعقة صغيرة ثوم مفروم
* ملح وفلفل
الطريقة:
1- سخني السمنة في إناء متوسط، بعد كده ضيفي عليها اللحمة والبصل وقلبيهم مع بعض، واستمري في التقليب لغاية لما تلاقي اللحمة طلعت المية اللي فيها وشربتها تاني، بعد كده ضيفي الكركم والقرفة والحبهان والملح والفلفل وقلبيهم مع بعض، وبعد كده ضيفي إليها شوية مية وسيبيها لغاية ما تغلي واللحمة تشرب المية دي.
2- سخني ملعقة زيت في طاسة متوسطة، وضيفي إليها الثوم والبقدونس وقلبيهم مع بعض لمدة خمس دقائق.
3- وبعد كده ضيفيهم على اللحمة ومعاهم الملح والفلفل وعصير الليمون، وسيبيهم لمدة نص ساعة أو لغاية ما تلاقي اللحمة استوت.

*******************
جيلي بالقشطة
جيلي بالقشطة
المقادير:
* علبة جيلي أي نوع أنتِ عايزاه
* علبة قشطة
* سكر حسب الرغبة
* كوب مية
الطريقة:
1- فضي محتويات الجيلي في إناء فيه كوب مية مغلية على نار متوسطة الحرارة مع التقليب المستمر لمدة عشر دقائق وبعد كده اطفي البوتاجاز.
2- حطي الجيلي في الثلاجة لحد ما يتماسك، وبعدين ضيفي القشطة والسكر واخلطيهم مع بعض كويس وزيني بهم الجيلي من فوق وبعد كده قدميه.

*******************

وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..

وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************