كلام يفطّر: أنت فاكر مرسي هيشكّل الحكومة.. أبسلوتلي إحنا هنشكّلها له

الواحد مش عارف يعدي يوم صيام من غير حرقة دم السياسة.. ومن غير التعرّض لأنه يقول كلام يفطّر بسبب تصريحات بعض(...) مش هقول إللي مكان النقط.. واللهم إني صائم
والحمد الله.. لحد النهاردة مقولتش كلام يفطّر وأنا صايم.. بس والله أنا عارف إنكم مستحملين بالعافية.. بس صبروا نفسكم بقول: اللهم إني صائم..
يعني امبارح وعلى الفطار كنت بسمع المستشار أحمد الزند -رئيس نادي رحلات ومصايف القضاة- وإوعى حد يفتكر إن بقلل من شأن المستشار الزند.. لأن دي وظيفته الحقيقية جراء منصبه كرئيس لنادي القضاء، وهو غللي قال كده بلسانه.. ولو عاوز تتأكد (اضغط هنا)
يقوم رئيس نادي القضاة إللي هو مختص بتيسير رحلات الحج والعمرة للقضاة وتوفير السيارات والمسكن لهم، يأمر رئيس الجمهورية بعدم تغيير وزير العدل الحالي، ويحذره إن قام بتغييره فإنه سيدخل في صراع مع القضاة سياسيًا، قائلاً: "أقول لرئيس الجمهورية إن كنت تنشد الاستقرار والعدل والمصالحة؛ فإننا لا نحجب عنك النصيحة، ولا نخفي ما في قلوبنا، فأبعدونا عن السياسة والأحزاب، نريد أن نظلّ بعيدين عن الصراعات السياسية، ولا أرى في مغادرة الوزير الحالي والإتيان بغيره إلا بابا لفتح الصراعات السياسية".
مختتمًا كلامه الموجه لرئيس الجمهورية: "لقد حكم قضاة مصر بتجديد الثقة في الوزير الحالي وحكم القضاء لا يقبل الطعن أو النقد".
ومحدش يسألني هو إيه دخل رئيس نادي القضاة بتشكيل الحكومة وتكليف وزير العدل.. علشان مش هرد غير ب"اللهم إني صائم"..
ومحدش يقول لي هو المستشار أحمد الزند إزاي يكلم رئيس الجمهورية كده، وهل هو كان بيقدر يفتح بقه مع حسني مبارك ويقول حاجة على إهانة وسحل القضاة وتزوير الانتخابات.. علشان مش هرد عليه وهقول: اللهم إني صائم..
وإوعى حد يقول حاجة وهو صائم لم يتذكر إن رئيس نادي القضاة معلقش بأي كلمة أو تصريح على تهريب الأجانب في قضية التمويل الأجنبي للمنظمات غير الشرعية، وليه هو كل شوية يتعمد إنه يتطاول على رئيس الجمهورية بألفاظ يعاقب عليها القانون.. فقط قل اللهم إني صائم
وإياك تسألني وتقولي إزاي توفيق عكاشة صاحب قناة الفراعي والمحكوم عليه بعدم الظهور في وسائل الإعلام، يكلمه المستشار أحمد الزند رئيس نادي القضاة على الهواء، ومش بس كده، دا كمان بيقول لتوفيق عكاشة انت راجل محترم من النخب.. إياك تقول كلام يفطّر .. فقط قل اللهم إني صائم
اللهم إني صائم
اللهم إني صائم