بيتي هيتخرب بسبب شغل الحموات

أنا واحدة متجوزة من 6 شهور وبحب جوزي أوي، وكان بيننا قصة حب بقالها سنين.. بس كل مشاكلنا بتنحصر بين أمي وأمه؛ أمهاتنا شخصياتهم قوية وعنيفة وكانوا زمايل في الشغل وبيكرهوا بعض.

حماتي بتحب السيطرة وأمي كانت بتشتكيها وسببت لها مشاكل ووقفت لها ترقيتها، وبعدين أمي سابت الشغل وراحت شركة تانية وبقت في منصب أعلى من منصب حماتي.. ومن ساعتها بقت غيرة الستات هي اللي متحكمة فيهم.

في الوقت ده كنت ارتبطت أنا وجوزي، وطبعا كنا مقدرين حجم المعاناة اللي هنلاقيها.. المهم حماتي طبعا ماكانتش عايزاني، وفعلا سببت لي مشاكل كتير وجرحتني كتير لدرجة إنها خلت جوزي يسيبني ويخطب غيري، بس هو ساب خطيبته ورجعنا لبعض وحارب عشان نتجوز وقدرنا الحمد لله.

أمي كانت بتغير من علاقتي بجوزي، وحماتي كانت بتغير من حب جوزي ليّ؛ لأن هما الاتنين ماكانوش مبسوطين في حياتهم، وطلعوا كل اهتمامهم فينا إحنا.. المهم قبل ما نتجوز بشهر أمي رفضت تديني فلوس كانت نقصاني لجهازي وجوزي ساعتها أخد منها موقف، وطبعا مامته شجعته يقاطع أمي.

الوضع دلوقتي إن أهل جوزي بيضغطوا عليّ؛ عايزيني أحبهم بالعافية وأودهم بالعافية وأحسسهم إنهم عيلتي الجديدة، رغم إنهم مقاطعين أهلي خالص، وكمان مانعين جوزي يتعامل مع أهلي، ولو راح مرة زارهم 5 دقايق بيكون من وراهم.

دلوقتي أهل جوزي بقوا يعملوا معاه مشاكل وبتأثر علينا، أنا لا قادرة أنفذ له اللي هو عايزة لأني بجد مش حاباهم.. ومش قادرة أسامحهم لإنهم باعدين جوزي عن أهلي.. أنا بقيت خايفة حياتي تخرب بسببهم.. أعمل إيه؟

heidi


صديقتي.. احترت كثيرا وأنا اقرأ رسالتك؛ لأن مشكلتك فعلا حساسة ومحيرة؛ مشكلتك مرتبطة بأمك وأم زوجك، يعني مش مجرد مشكلة الحماة العادية اللي بتعمل حاجات تضايق الزوجة أو تستقصد الزوج، ولكن مشكلة أم قصاد أم بدأوا حربهم مع بعض من زمان، ودلوقتي فرصتهم مرة تانية علشان يستخدموكم أدوات جديدة للحرب.

لكن الحب اللي بينك وبين زوجك واللي قدر يقف قدام الحرب دي وقدام كل الصعوبات دي لحد ما ربنا أكرمكم بإتمام الزواج أكيد مش هيستسلم أبدا.

يمكن الطريق مش هيبقى سهل في البداية، لكن أكيد إنتي وزوجك كنتم متوقعين بعض الصعوبات من البداية.

دلوقتي خلينا نقسم حل مشكلتك لخطوات:
أولا: لازم إنتي وزوجك تتفقوا إنكم ما تتأثروش بالخلافات اللي ما بينهم، يعني ولا والدة زوجك تمنعه من إنه يتعامل مع عيلتك ولا إنتي ترفضي التعامل مع أهله وتحسّي إنك مغصوبة عليهم، يعني كل واحد فيكم يحاول يكسب الجولة الأولى مع الطرف الآخر، فإنتي تقربي من حماتك وتحببيها فيكِ وتنسيها صورة والدتك اللي أكيد بتفتكرها كل ما بتشوفك.. وزوجك يحاول يقرب من والدتك ويحاول ينسى أي موقف وحش عملته فيه في فترة الخطوبة، واعرفوا كويس إنكم لو بتحبوا بعض فعلا هيكون سهل عليكم إنكم تنسوا أي ألم اتسببت لكم فيه تصرفات حماتك أو والدتك لمجرد إن كل واحدة فيهم هي أم الإنسان اللي بتحبّوه..

زوري حماتك دايما مع زوجك وعامليها برفق وود؛ لأنها في سن والدتك ولأنها أم حبيبك، وطبعا زوجك لازم يبعد عن تأثير والدته عليه، ويزور والدتك بشكل منتظم علشان تحبه وتشوف هو أد إيه بيحبك وبيتعامل معاكِ بحنية وحب، وأكيد مع الوقت هتحبه وهيدوب جبل الجليد اللي ما بينهم.

ثانيا: حاولوا تحسّسوا أمهاتكم إن تأثيرهم السلبي على حياتكم وإن المشكلات الكتيرة اللي بيسبّبوها لكم ممكن تبعدكم عنهم، وده طبعا مش بالخناق، ولكن بأسلوب حلو وذكي، ولازم كل واحد فيكم يفهّم والدته بإنه مش هيسمح بأي تجاوز في حق شريك حياته، ويكون الكلام ده واضح وصريح ولكن مش بطريقة تستفزهم.

ثالثا: أكيد لازم تتعاملوا معاهم بشكل كويس ويكون فيه تواصل باستمرار، لكن ده مش معناه إنهم يدخلوا في تفاصيل حياتكم.. يعني لازم إنتي وزوجك ما تدخلوش حد في قرارتكم الخاصة، ولا كمان تحكوا لحد عن حياتكم الخاصة؛ لأن ده هيدّي فرصة للتدخل والاختلاف، لأن أكيد شخصيات زي شخصيات حماتك ووالدتك هتكون آراؤهم مختلفة تماما، ووقتها كل واحدة فيهم هتكون عايزة تنتصر على التانية، وطبعا ده كله هينعكس عليكم.

علشان كده لازم تتفقي إنتي وزوجك إن حياتكم وأسراركم وتفاصيلكم ما تطلعش من بينكم.

وفي النهاية لازم تعرفي إن رضا الأم مهم جدا عند ربنا، والرسول صلى الله عليه وسلم عندما سأله رجل: "يا رسول الله، من أحق الناس بحسن صحابتي؟ قال: أمك، قال: ثم من؟ قال: أمك، قال ثم من؟ قال: أمك، قال: ثم من؟ قال: أبوك.

يعني مش لازم تنسوا أبدا إن طاعة الأم حاجة وصانا عليها الله ورسوله، علشان كده راعوهم دايما مهما عملوا ومهما تعبوكم؛ لأنهم في يوم من الأيام استحملوا تعب وأوجاع كتيرة علشان خاطركم، فلازم تستحملوا شوية ولكن مع الصبر والحكمة في التعامل.

واعرفوا إن صبركم عليهم دلوقتي ربنا هيعوضكم عنه في يوم من الأيام.. مع دعائنا لكِ ولزوجك بالتوفيق والنجاح في حياتكما إن شاء الله.

لو عايز تفضفض لنا دوس هنا