حاولي تفهّميه أحسن ما تسيبيه

شكرا جدا على الموقع الجميل ده، وبجد جزاكم الله كل خير على كل المجهود اللي بتقدموه هنا.
أنا عندي 24 سنة، تزوجت من شهرين تقريبا، جوزي سافر بعد جوازنا بحوالي أسبوع؛ علشان ظروف عمله في الخارج.
المشكلة مش في كده، المشكلة إن الحمد الله أنا ظروفي المادية كويسة بس مش أوي، بس باقدر أجيب كل اللي أنا عايزاه، وبابا مدلّعني جدا ومش بيحرمني من حاجة.. أنا اتعرفت على جوزي في الكلية، وقفت جنبه كتير؛ حتى الفلوس اللي سافر بيها أنا اللي إدتها له.
اتخطبت له حوالي 3 سنين، والمشكلة بدأت لما بدأ يشتغل براتب كويس، لو فيه جنيه معاه بيفكر في نفسه وأهله، ولما أقول: وأنا فين؟ يقول لي: إنتي تقدري تتصرفي، أنا اللي ظروفي وحشة، وأنا أتصرف؛ أبيع دهبي اللي بابا جايبه لي، أستلف من أمي مش مشكلة، ويقول لي: إن شاء الله هاعوضك؛ لكن لو حد من أهله طلب أي حاجة بيستلف وبيتصرف، ويقول: أصل هم هيعملوا إيه؟ أصلهم عشمانين فيّ؛ إنما إنتي حبيبتي اللي تستحملني، وإن شاء الله هاعوضك.
لو حصلت بيني وبين أي حد من أهله مشكلة؛ يقول لي: إنتي اللي غلطانة، أقول له: ليه؟ يقول لي: هم جواهم بيحبوكي، وهم نيتهم كويسة.. أنا باتكلم عن تصرفات وإهانات ليّ، وهو يقول لي جواهم ونيتهم.
أنا حاسة إني لازم أتطلق من دلوقتي؛ عشان بقيت باكره حتى أتكلم معاه. بيقول لي: المشكلة إني مش باثق فيه؟! إزاي وأنا حتى فقدت الثقة في نفسي، أنا خايفة منه ومن بكرة، ومن كلام الناس. وتصرفاته غريبة معايا، وحياته ماكنتش متخيلة إني أعيشها، وكل ما أكلمه يقول لي: أنا عمري ما ظلمتك، هو يعني إيه ظلم الأول، علشان هو فاهم إنه عمره ما ظلمني؟!
آسفة على الإطالة.
leila


لو عايز تفضفض لنا دوس هنا