كفتة التونة.. أكلة خفيفة وصحية

لكل الناس اللي عايزة طريقة جديدة علشان تعمل بها التونة، النهارده هنعمل مع بعض كفتة التونة بالخضراوات..
كفتة التونة بالخضراوات
المقادير:
* 3 علبة كبيرة تونة
* ملعقة صغيرة كزبرة مجففة ومطحونة
* 2 بيضة مخفوقة مع الملح والفلفل
* 2 عود بصل أخضر مفروم
* 1⁄4 كوب بقدونس مفروم
* 2 ملعقة كبيرة زيت زيتون
* 1⁄4 كوب كزبرة مفرومة
* ثمرة صغيرة جزر مبشور
* ملعقة صغيرة بهارات
* كوب بسلة مسلوقة
* ملعقة صغيرة كمون
* ملعقة صغيرة كركم
* ملح وفلفل أسود
* 4 ثمرة بطاطس
* كوب بقسماط
* زيت ذرة
الطريقة:
1- اغسلي البطاطس واسلقيها في ميه مضاف إليها بعض الملح لغاية ما تستوي تماما، وبعد كده سيبيها تبرد وقشّريها واهرسيها، بس خلّي بالك إنها ماتبقاش ناعمة أوي.
2- بعد كده ضيفي عليها التونة والبصل الأخضر والكزبرة والبقدونس والبسلة والجزر والبهارات والملح والفلفل والكزبرة والكمون والكركم والزيتون، وقلّبي الخليط مع بعضه كويس، واعجنيه بإيدك لغاية ما يشكّل عجينة متماسكة، وبعد كده شكّلي العجينة لأقراص أو أصابع على حسب رغبتك.
3- شيلي الكفتة في الفريزر لمدة نصف ساعة علشان تتماسك وما تتفككش منك وقت القلي، وبعد كده طلّعيها واغمسيها في البيض وبعد كده في البقسماط.
4- اقلي الكفتة في كمية صغيرة من الزيت لغاية ما يبقى لونها دهبي من الناحيتين، وبعد كده ارفعيها على مناديل ورقية علشان تشرب الزيت وقدّميها.. وبالهنا والشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،