يخني الكفتة بالخضار

النهارده هنقدّم لك طريقة عمل يخني الكفتة بالخضار؛ يلّا بينا على المطبخ علشان نشوف هنعمله إزاي...
يخني الكفتة بالخضار
مقادير الكفتة:
* 1⁄2 كيلو لحمة مفرومة
* بيضة مخفوقة بالملح والفلفل الأسود
* 1⁄4 كوب برغل ناعم مغسول ومصفّى
* 1⁄2 كوب بقسماط مطحون
* بصلة متوسّطة الحجم
* ثمرة فلفل أخضر حار
* 1⁄4 حزمة بقدونس
* ملعقة كبيرة توابل
* ملح وفلفل أسود
مقادير الخضار:
* 1⁄4 كيلو بسلة مسلوقة ومصفّاة
* 1⁄4 كيلو فاصوليا مسلوقة ومصفّاة
* 2 ثمرة بطاطس مقطّعة قطع صغيرة
* 2 ثمرة جزر مقطّعة قطع صغيرة
* 1⁄4 معلقة صغيرة ريحان مجفف
* بصلة مقطّعة قطع صغيرة
* 3 فصوص ثوم مفرومين
* 2 ملعقة كبيرة سمنة
* 2 كوب عصير طماطم
* 2 كوب شوربة لحمة
* ملح وفلفل أسود
الطريقة:
1- لتجهيز الكفتة؛ افرمي كل المقادير ما عدا اللحمة المفرومة في الكبة أو في الخلاط، وضيفيها على اللحمة المفرومة وقلّبيهم كلهم مع بعض كويس.
2- بعد كده شكّلي اللحمة على شكل كرات ورصّيها في صينية بايركس مدهونة بملعقة زيت، ودخّليها الثلاجة لمدة 10 دقائق علشان الكفتة تتماسك، وبعد كده دخّليها الفرن على درجة حرارة متوسطة لمدة نص ساعة أو لغاية ما تلاقي إن الكفتة استوت.
3- لتجهيز الخضار؛ شوّحي البصلة في السمنة على النار لمدة 5 دقائق أو لغاية ما تلاقي لونها بقى ذهبي، وبعد كده ضيفي عليها كل الخضار الموجود عندك والثوم، وقلّبيهم كلهم مع بعض على النار لمدة ربع ساعة.
4- ضيفي عصير الطماطم والملح والفلفل الأسود والريحان، وسيبيهم على النار لمدة 10 دقائق علشان الطماطم تتسبّك.
5- بعد كده ضيفي الكفتة والشوربة وسيبيهم على النار لمدة 10 دقائق؛ علشان الكفتة تتشرّب من الطماطم، بعد كده اغرفيها في أطباق التقديم، وقدّمي معاها طبق أرز أبيض، وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،