مكرونة بالفلفل الملون والكاري

النهارده هنقدّم لك طريقة جديدة وبسيطة لعمل طبق المكرونة، وعلى فكرة طريقتنا مش هتاخد من وقتك أكتر من نصف ساعة، يلّا بينا على المطبخ نشوف طريقتنا عبارة عن إيه..
مكرونة بالفلفل الملون والكاري
المقادير:
* كيس مكرونة مسلوقة ومصفاة
* 2 ثمرة فلفل أصفر مقطّعة شرائح
* 2 ثمرة فلفل أحمر مقطّعة شرائح
* 2 ثمرة فلفل أخضر مقطّعة شرائح
* بصلة كبيرة مقطعة شرائح
* كوب كبير عصير طماطم
* 2 ملعقة كبيرة كاري
* 2 ملعقة كبيرة زيت
* ثمرة جزر مبشُورة
* فلفل أسود
* ملح
الطريقة:
1- شوّحي البصلة في الزيت على النار لمدة 5 دقائق، بعد كده ضيفي عليها الكاري والفلفل الأحمر والأصفر والأخضر والجزر، وقلّبيهم كلهم مع بعض على النار لمدة 10 دقائق.
2- ضيفي عصير الطماطم والملح والفلفل الأسود، وسيبيهم على النار لمدة ربع ساعة؛ علشان الطماطم تتسبك، وبعد كده ضيفي المكرونة وقلبيهم كلهم مع بعض كويس.
3- سيبي المكرونة على النار لمدة 10 دقائق، وبعد كده حطّيها في أطباق التقديم.. وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،