النهارده هنقدّم لك طريقة جديدة لعمل الجمبري؛ يلا بينا على المطبخ نشوف هنعمل إزاي جمبري بالبسلة والكاري.. جمبري بالبسلة والكاري المقادير: * 1⁄2 كيلو جمبري متوسّط الحجم ومغسول ومصفّى * 3 ثمرات طماطم مقطّعة قطع صغيرة الحجم * بصلة كبيرة مقطعة قطع صغيرة الحجم * 1⁄2 كيلو بسلة مسلوقة ومصفّاة * 2 ملعقة كبيرة عصير ليمون * ثمرة فلفل أخضر مفروم * 2 ملعقة كبيرة زيت ذرة * 5 فصوص ثوم مفرومين * 2 ملعقة كبيرة كاري * ملعقة كبيرة كمون * ملح وفلفل الطريقة: 1- لتجهيز تتبيلة الجمبري، اخلطي نصف كمية الثوم مع الفلفل الأخضر والكمون والملح وعصير الليمون، وتبّلي الجمبري في الخلطة دي لمدة ربع ساعة. 2- شوّحي البصل في الزيت على النار لمدة 5 دقائق، وبعد كده ضيفي عليه الكاري والثوم، وقلّبيهم كلهم مع بعض لمدة 5 دقائق. 3- بعد كده ضيفي عليهم البسلة والطماطم والملح والفلفل، وسيبيهم على النار لمدة 5 دقائق علشان الطماطم تتسبّك، وبعد كده ضيفي الجمبري وقلبيهم كلهم مع بعض كويس. 4- سيبي الجمبري على النار لمدة 10 دقائق علشان يستوي، وبعد كده حطّيه في طبق التقديم وزيّني الطبق بأوراق الكزبرة الخضراء، وبألف هنا وشفا. وبكده تكون خلصت وصفتنا النهارده.. يا ريت تجرّبوها وتبعتوا تقولوا لنا على النتيجة.. واستنونا بكره مع وصفة جديدة.. سلاااااااام،،،