فاصوليا بيضاء على الطريقة الإيطالية

النهارده جبنا لك طبق من المطبخ الإيطالي علشان تقدري تنوّعي في الأكلات اللي بتقدّميها لأسرتك، والطبق اللي معانا النهارده هو طبق الفاصوليا البيضاء بالسوسيس؛ يلّا بينا على المطبخ علشان نشوف هنعمله إزاي...
فاصوليا بيضاء بالسوسيس
المقادير:
* 1⁄4 كيلو فاصوليا بيضاء
* كوب كبير شوربة لحمة أو فراخ
* كيس سوسيس "هتلاقيه في السوبر ماركت"
* ثمرة فلفل أخضر مقطّعة قطع صغيرة
* بصلة كبيرة مقطّعة قطع صغيرة جدا
* 3 فصوص ثوم مقطّعين قطع صغيرة
* كوب كبير عصير طماطم
* ملعقة صغيرة زعتر
* ملعقة كبيرة زبدة
* كوب كبير زيت
* ملح وفلفل
الطريقة:
1- اغسلي الفاصوليا وانقعيها في الميه لمدة نص ساعة، وبعد كده اسلقيها لمدة ربع ساعة، أول ما تلاقي إن الفاصوليا هتبدأ تستوي شيليها من على النار، وحطّيها في مصفاة واشطفيها وسيبيها في المصفاة علشان تصفّي أي ميه موجودة فيها.
2- حمّري السوسيس في الزيت لغاية لونه ما يبقى ذهبي، وبعد كده حطّيه على مناديل ورق علشان تتشرّب الزيت اللي فيه.
3- شوّحي البصلة في الزبدة على النار لمدة عشر دقائق، وضيفي معاها الفاصوليا والثوم والفلفل، وقلّبيهم كلهم مع بعض على النار لمدة ربع ساعة.
4- بعد كده ضيفي عليهم عصير الطماطم، وسيبيهم على النار لمدة نصف ساعة علشان تتسبّك.
5- وبعدين ضيفي عليهم كوب الشوربة والسوسيس والملح والفلفل والزعتر وسيبيهم على النار لمدة ربع ساعة، وبعد كده اغرفيها في أطباق التقديم وزيّنيها بالبقدونس الأخضر.. وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،