عزومة 25 رمضان

عصير الأناناس بالبرتقال
العصير ده طريقته سهلة جداً، وكمان له فوايد كتيرة جداً..
المقادير:
* 4 ملاعق كبيرة عصير برتقال
* عصير أناناس
* 1/2 كوب سكر
* 3 أكواب مية
* مكعبات ثلج

الطريقة:
اضربي كل المكونات في الخلاط مع بعض، وبعد كده صبي العصير في الكوبايات.

*******************
سلطة الجزر والفجل
سلطة الجزر والفجل
المقادير:
* 1/2 حزمة بقدونس مقطع قطعاً صغيرة
* 1 كوب جبنة بيضاء مقطعة مكعبات
* 4 فجلات كبيرة
* 3 جزرات متوسطة
* عصير ليمونة
* ملعقة صغيرة ملح
* 1/2 كوب زيتون أسود
* فصين ثوم مفرومين
* 1/4 كوب زيت زيتون
الطريقة:
1- اغسلي الجزر والفجل كويس، وبعد كده ابشريهم.
2- دقي الثوم مع الملح، وضيفي إليهم عصير الليمون والزيت، وقلبيهم مع بعض كويس، وبعد كده ضيفيهم إلى الجزر والفجل، وقلبيهم مع بعض كويس، وبعد كده ضيفي إليهم الجبنة والبقدونس والزيتون الأسود.

*******************
شوربة البنجر
شوربة البنجر
المقادير:
* 5 ثمرات بنجر
* 5 ثمرات بطاطس مقطعة مكعبات
* 2 ثمرة جزر مقطعة مكعبات
* مكعب مرقة دجاج
* 3 فصوص حبهان
* 1/2 كوب كريمة لباني
* ورق لاورا
* ملح وفلفل

الطريقة:
1- اسلقي البنجر كويس أوي لمدة ساعتين في إناء عميق، بعد كده اطفي البوتاجاز وسيبي البنجر لغاية ما يبرد وقشريه وقطعيه مكعبات صغيرة.
2- اسلقي الجزر مع البطاطس، وضيفي إليهم أثناء السلق مكعب مرقة دجاج وورق اللاورا والحبهان والملح والفلفل.
3- لما تلاقي إن الجزر والبطاطس بدأت تستوي ضيفي إليهم البنجر والكريمة اللباني وسيبيهم مع بعض على النار لمدة 5 دقائق مع التقليب المستمر، بعد كده اضربي الشوربة في الخلاط لغاية ما كل المكونات تتجانس، وبعد كده رجعيها مرة تانية على النار وسيبيها لمدة خمس دقايق، وبعد كده حطي الشوربة في أطباق الشوربة.

*******************
طاجن الفريك باللحمة
طاجن فريك باللحمة
المقادير:
* 1/2 كيلو لحمة بتلو مقطعاً قطعاً صغيرة
* 1/2 2 كوب فريك
* بصلة متوسطة مقطعة قطعاً صغيرة جداً
* 2 ملعقة كبيرة زبدة
* حبهان
* ملح وفلفل
الطريقة:
1- اغسلي الفريك كويس، وبعد كده حطيه في المصفاة علشان يصفي المية اللي فيه.
2- سخني ملعقة زبدة في إناء متوسط فوق نار متوسطة وضيفي إليها البصلة ومكعبات اللحمة، وسيبيهم مع بعض على النار لمدة 20 دقيقة مع التقليب، بعد كده ضيفي إليها 1/2 كوب ماء والحبهان والملح والفلفل، وسيبيها على النار لمدة 20 دقيقة.
3- بعد مرور العشرين دقيقة ضيفي إليها الفريك وقلبيهم مع بعض لمدة 5 دقائق، وبعد كده ضيفي إليهم كمية من المية تغطي اللحمة والفريك، وسيبيهم لغاية ما الفريك يتشرب المية.
4- هاتي صينية فرن، وحطي فيها اللحمة والفريك، وضيفي إليهم ملعقة زبدة من على الوش، ودخلي الصينية الفرن على درجة حرارة متوسطة لمدة ربع ساعة أو لغاية ما تلاقي إن وشها احمرّ طلعيها.

*******************
صوابع البلح بالجوز
صوابع البلح بالجوز
المقادير:
* كوب بلح منزوع النوى ومقطع
* 2 ملعقة زبدة
* كيلو لبن مُحلى
* ملعقة كبيرة عسل
* كوب مية
* 1/2 كوب جوز هند
* 1/2 كوب جوز مفروم
* 2 كوب بسكويت مطحون
* شيكولاتة للتزيين
الطريقة:
1- حطي البلح مع الزبدة واللبن والعسل والمية في إناء، وحطيه على النار مع التقليب المستمر لمدة 5 دقائق، أو لغاية ما تلاقي البلح بدأ يلين، وشيليه من على النار.
2- بعد كده ضيفي إليه جوز الهند والبسكويت المطحون والجوز، وقلبيهم مع بعض هتحسي بإن الخليط بقى متماسك شوية.
3- هاتي صينية بايركس، وادهنيها بشوية زبدة، وافردي فيها الخليط ده.
4- بعد كده اعملي حمام مية سخنة للشيكولاتة علشان تسيح عن طريق إنك تجيبي طبق فيه مية سخنة وتحطي فوقيه طبق تاني فيه؛ بس يكون أصغر منه، وتحطي فيه الشيكولاتة دي، وتسيبيها لغاية ما تسيح، بعد كده شيليها وجملي بيها صينية البلح.. استني شوية لغاية ما تبرد، وبعد كده قطعيها على شكل صوابع.

*******************

وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************