كفتة الفراخ المحشية بالجبنة

لو عايزة تعملي أكلة جديدة وكمان سهلة وسريعة؛ جرّبي معانا على "سفرة دايمة" كفتة الفراخ المحشية بالجبنة، وماتنسيش تبعتي لنا رأيك فيها وكل الوصفات اللي عايزة تعرفيها..
كفتة الفراخ المحشية بالجبنة
المقادير:
* 4 صدور فراخ
* ملعقة صغيرة زعتر
* ملعقة صغيرة كزبرة
* ملعقة صغيرة حبهان مطحون
* ثمرة بطاطس متوسّطة
* ملح وفلفل أسود
للحشو:
* 10 مكعبات جبنة كريمي (ممكن تستخدمي جبنة نستو أو شيدر)
* 2 ملعقة كبيرة بقدونس مفروم
* 1⁄2 كوب مشروم مفروم
للتغطية:
* 2 بيضة
* 2 كوب بقسماط ناعم
* 1⁄2 ملعقة صغيرة ملح
* رشة فلفل أسود
* زيت ذرة للقلي
الطريقة:
1- اسلقي البطاطس نصف سوى وقطّعيها شرائح، وسيبيها لحد ما تبرد تماما.
2- افرمي صدور الفراخ وشرائح البطاطس مع بعض في المفرمة، وبعد كده تبّليها بالملح والفلفل والكزبرة والزعتر والحبهان، واعجني الخليط كله بإيدك كويس.
3- لتحضير الحشو؛ اخلطي المشروم مع الجبنة والبقدونس، وقلّبيهم مع بعض كويس.
4- خدي كمية مناسبة من الكفتة وافرديها على إيدك، واحشيها بكمية مناسبة من الحشو، ولفّيها على شكل صوابع، وكرّري الخطوة دي لغاية ما كل الكمية تخلص.
5- اخفقي البيض في طبق وحطي عليه الملح والفلفل، وحطّي أصابع الكفتة في البيض وبعد كده في البقسماط.
6- حمّري الكفتة في زيت ساخن وغزير، وبعد كده طلّعيها على مناديل ورقية علشان تتشرّب الزيت، وعند التقديم زيّنيها بالبقدونس.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..