سلطة البطاطس المشوية بالخضراوات

النهارده هنقدّم لك طبق سلطة لكل الناس اللي كانت عايزة طريقة صحية لتقديم البطاطس، مليان بالعناصر الغذائية المفيدة لجسمك، وفي نفس الوقت خالي من السعرات الحرارية للناس اللي بتعمل ريجيم.. تعالي نشوف إيه هو الطبق اللي معانا النهارده..
سلطة البطاطس المشوية بالخضراوات
المقادير:
* 4 ثمرات بطاطس حجم كبير
* ثمرة بروكلي مقطّعة قطع صغيرة جدا
* 1⁄4 كوب كرنب أحمر مقطّع قطع صغيرة جدا
* 1⁄4 كوب بصل أخضر مقطع شرائح
* ملعقة كبيرة عصير ليمون
* 1⁄4 كوب جزر مبشور
* ملعقة صغيرة زبدة


الطريقة:
1- هاتي البطاطس واغسليها كويس، واعملي فيها فتحات كتيرة جدا باستخدام الشوكة، وبعدين تبّليها بالملح والفلفل وامسحيها بطبقة خفيفة جدا من زيت الزيتون، وحطّيها على الصاج بتاع فرن البوتاجاز، وشغّلي عليها الشواية لمدة ساعة على الأقل.
2- سيّحي الزبدة في طاسة، وشوّحي فيها باقي المقادير اللي عندك لمدة 5 دقائق، أو لغاية ما تحسّي إن كل الخضار استوى وبقى طري.
3- طلّعي البطاطس من الفرن، وافتحيها من فوق على شكل دائري، وحطّي من فوق خليط الخضراوات اللي عملتيه.. وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره على خير مع وصفة جديدة..
سلااااااااااام،،،