بطاطس مشوية بالليمون والبقدونس

النهارده هنعمل مع بعض طبق بطاطس لكن بشكل جديد، علشان تغيّري في الطريقة اللي بتقدّميها بها، وممكن تعملي الطبق ده على الفطار أو العشاء، أو بجانب الطبق الرئيسي على الغداء، جرّبي وصفتنا النهارده، وابعتي قولي لنا رأيك فيها..
بطاطس مشوية بالليمون والبقدونس
المقادير:
* 4 ثمرات بطاطس
* 2 ملعقة زيت زيتون
* 2 ملعقة صغيرة ثوم مفروم
* 1⁄2 كوب عصير ليمون
* بقدونس طازج
* ملح وكمون
* قطعة زبدة
الطريقة:
1- قطّعي البطاطس شرائح عريضة، واغسليها كويس بالميه والخل.
2- تبّلي البطاطس بالملح وادهنيها بشوية زيت، ولفّيها في ورق فويل، ودخّليها الفرن علشان تستوي كويس.
3- بعد ما تتأكّدي إن البطاطس استوت، طلّيعها من الفرن، وحطّي عليها الزبدة.
4- حضّري الصوص اللي هتحطّيه على البطاطس عند التقديم، بإنك تخلطي الثوم المفروم مع الكمون والبقدونس وملعقة زيت وعصير الليمون، وقلّبيهم مع بعض كويس أوي.
5- عند التقديم، ضيفي الصوص على البطاطس وقدّميها.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..