بط محشي بالفريك.. لعزومة شيك

النهارده هنعمل مع بعض "بط محشي بالفريك"..
والطبق ده من الأطباق الشهية جداً وناس كتير بتحبه..
وبيبقى مميز جداً في العزومات والمناسبات الخاصة..
تعالوا نشوف الطريقة مع بعض..
المقادير:
بطة متوسطة الحجم.
بصلة مقطعة قطع صغيرة جداً.
3 بصلات مقطعة إلى شرائح.
حبة طماطم مبشورة.
ملعقة كبيرة زبد.
2 ملعقة كبيرة زيت.
نص كيلو فريك.
بهارات دجاج.
ملح وفلفل.
ورق لاورا.
الطريقة:
1- أحضري الفريك واغسليه، وبعد كده انقعيه في المية لمدة ساعة، بعد كده أحضري مصفاه وحطيه فيها علشان يصفي الميه اللي فيه.
2- سخني الزبد والزيت في إناء متوسط فوق نار متوسطة، وضيفي إليهم الفريك وقلبيهم مع بعض لغاية ما لون الفريك يصفر، بعد كده ضيفي الطماطم المبشورة والبصل والملح والفلفل وشوحيهم على النار لمدة 10 دقائق على نار هادئة.
3- أحضري البطة واغسليها كويس بالملح والدقيق والليمون، وبعد كده اغسليها بالمية.
4- احشي البطة بخلطة الفريك، وبعد كده أحضري صينية فرن، وحطي فيها شرائح البصل وورق اللاورا والملح والفلفل، وحطي فوقهم البطة ورشي على البطة الملح والفلفل وبهارات الدجاج وكوباية كبيرة مية وغطيها بورق ألومونيوم وحطي في الصينية.
5- سخني الفرن على نار متوسطة وحطي فيه الصينية, وبعد ساعة طلعيها من الفرن وشيلي من عليها ورق الألومونيوم ودخليها الفرن تاني وسيبيها لغاية ما تلاقيها احمرت واستوت خرجيها.. وبالهنا والشفا.
وبكده تكون خلصت وصفتنا النهارده، ونتمنى إنكم تجربوها وتبعتوا تقولوا لنا رأيكم فيها، وكمان لو عندك أي أكلة عايزة تعرفي طريقتها ممكن تبعتِ لنا وإحنا هنقدّمها لك في أقرب وقت.
ولو عندك وصفة جامدة تكوني جربتيها قبل كده..
وعايزة تشاركي بها معانا..
وتنزل على باب "صحة وجمال" باسمك..
ابعتِ لينا على لينك..

"ورينا شطارتك"
وإلى اللقاء مع وصفة جديدة،،،،