لو عايزة تعملي أكلة سريعة وفي نفس الوقت مغذية، أو لو بتعملي ريجيم وعايزة أكلة شهية، جرّبي معانا النهارده على "سفرة دايمة" سلطة سيزر. سلطة سيزر المقادير: 3 قطع صدور فراخ 2 ملعقة كبيرة مايونيز 2 ملعقة كبيرة زيت زيتون 2 فص ثوم مفروم 1 خس كابوتشا 1⁄4 كوب خل ملح وفلفل جبنة بارميزان (أو أي نوع تحبّيه) للتزيين: 2 قطعة توست زيتون أسود حلقات طماطم مقطّعة شرائح الطريقة: 1- شوّحي قطع الفراخ في قطعة زبدة صغيرة، وقطّعيها شرائح رفيعة.
2- اخلطي المايونيز والملح والفلفل والخل والزيت والثوم، وقلّبيهم مع بعض كويس أوي.
3- قطّعي الكابوتشا قطع صغيرة، وحطّي عليها الخليط اللي عملتيه مع الجبنة البارميزان وقلّبيهم مع بعض.
4- ادهني التوست بشوية زبدة، ودخّليه الفرن علشان يتحمّص، وبعد ما تطّلعيه كسّريه لقطع صغيرة، وضيفيه على الكابوتشا والخليط اللي عملتيه في طبق التقديم.
5- وفي الآخر حطّي قطع الفراخ، وزيّني الطبق بشرائح الطماطم والزيتون، وممكن تحطّي على الوش شوية جبنة بارميزان.. وبالهنا والشفا. وبكده تكون خلصت وصفتنا النهارده.. نتمنّى إنكم تجرّبوها وتبعتوا تقولوا لنا رأيكم فيها.. وكمان لو عندك أي وصفة عايزة تعرفيها ممكن تبعتي لنا.. وإحنا هنقدّمها لك في أقرب وقت.
