شوربة الفراخ بالكريمة

وصفتنا النهارده سهلة وكمان مغذيّة ومناسبة جدا مع البرد، وهي شوربة الفراخ بالكريمة، جرّبيها وابعتي لنا رأيك فيها، وماتنسيش تقولي لنا على كل الوصفات اللي عايزة تعرفيها..
شوربة الفراخ بالكريمة
المقادير:
2 قطعة صدور فراخ متبّلة
2 ملعقة صغيرة عصير ليمون
4 ملعقة كبيرة دقيق
2 كوب شوربة فراخ
2 ملعقة كبيرة زبدة
كوب كريمة للطبخ
ملح وفلفل
كوب لبن
بيضة
الطريقة:
1- حطّي الزبدة في حلة على النار، وحطّي عليها الدقيق، وقلّبيهم كويس لحد ما الدقيق يبقى لونه دهبي.
2- اضربي البيضة كويس مع اللبن وحطّيهم على الدقيق، واستمرّي في التقليب كويس، وحطي عليهم الكريمة والشوربة.
3- قطّعي صدور الفراخ لمكعبات صغيّرة وشوّحيها في النار مع ملعقة زبدة، وبعد كده حطّيها على الشوربة، وسيبيها على النار لمدة خمس دقائق.
4- حطّي الشوربة في أطباق التقديم، وممكن تزيّنيها بالبقدونس.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت.