فيتوتشيني بصوص الفراخ والمشروم

لكل عشّاق المكرونة، النهارده هنعمل مكرونة فيتوتشيني بصوص الفراخ والمشروم، وهو طبق سهل وبسيط ممكن تعمليه لو عايزة تاكلي حاجة مختلفة ولذيذة..
مكرونة فيتوتشيني بالفراخ والمشروم
المقادير:
* كيس مكرونة شرايط مسلوقة
* 1⁄4 كيلو صدور فراخ متبلة ومقطّعة مكعبات
* كوب كريمة طبخ (هتلاقيها في السوبر ماركت)
* 1⁄4 كيلو مشروم شرائح
* ملعقة كبيرة زبدة
* 1⁄2 بصلة مفرومة
* 1⁄2 كوب شوربة
* ملح وفلفل
ملحوظة:
ممكن تستبدلي المكرونة الشرايط بالمكرونة الأقلام لو مش متوفّرة عندك.
الطريقة:
1- شوّحي البصل المفروم مع الزبدة في طاسة على النار، وبعد كده حطّي عليها صدور الفراخ، وقلّبيهم مع بعض لحد ما الفراخ تستوي كويس.
2- ضيفي المشروم والشوربة على الفراخ، وقلّبيهم كويس مع بعض، وفي الآخر ضيفي كريمة الطبخ، وسيبيهم لحد ما يغلوا مع بعض، وبعد كده تبّليهم بالملح والفلفل.
3- بعد كده ضيفي المكرونة على الصوص، وقلّبيهم مع بعض كويس، وحطّي المكرونة في أطباق التقديم، وممكن تزيّني الطبق بأوراق الريحان أو البقدونس المفروم.. وبالهنا والشفا.
وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..