شوربة المشروم بالكريمة على "سفرة دايمة"

وصفتنا النهارده سهلة، وكمان مغذيّة، ومناسبة جدا مع البرد، وهي شوربة المشروم بالكريمة، جرّبيها وابعتي لنا رأيك فيها، وماتنسيش تقولي لنا على كل الوصفات اللي عايزة تعرفيها.

شوربة المشروم بالكريمة
المقادير:
* 1⁄4 كيلو مشروم
* 4 كوب شوربة فراخ
* 4 ملعقة كبيرة زبدة
* 3 ملعقة كبيرة دقيق
* بصلة مفرومة
* كوب كريمة طبخ (هتلاقيها في السوبر ماركت)
* ملح وفلفل
الطريقة:
1- شوّحي البصلة على النار مع ملعقة زبدة، وبعد كده ضيفي المشروم عليها، وقلّبيهم مع بعض كويس، وتبّليهم بالملح والفلفل.

2- هاتي طاسة تانية، وحطّي فيها باقي الزبدة والدقيق، وقلّبيهم كويس مع بعض، وبعد كده ضيفي الشوربة تدريجيا مع الاستمرار في التقليب علشان الشوربة ما تعملش تكتلات.
3- حطّي خليط المشروم في الخلاط، واضربيه كويس، وضيفيه على الشوربة وقلبيها كويس على النار.
4- في الآخر، ضيفي كوب الكريمة على الشوربة، وقلّبيها وسيبيها لحد ما الشوربة تبدأ تغلي، وقدّميها في أطباق التقديم، وممكن تزيّنيها بالبقدونس.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،