أهلي بيضحكوا عليّ علشان عايزة أفتح أتيليه

السلام عليكم.. أنا بجد باشكركم أوي على الموقع ده.. أنا بعت مشكلة ليّ عاطفية قبل كده، وأنتم أديتوا لى مفتاح حلها والحمد لله أنا أحسن دلوقتي.
وأنا باتمنى تحلوا لي مشكلتي التانية وهي إني في آخر سنة في الكلية وأنا في كلية آداب أنا دخلتها غصب عني وأنا مش بحبها، بس الحمد لله بانجح كل سنة بس المشكلة إني مش بحب التدريس خالص ومش متخيلة نفسي بادرس في يوم من الأيام، مع العلم إني نفسي أشتغل شغل يخصني، وفكرت إني أخلص وأفتح أتيليه والمشروع ده داخل دماغي أوي بس لما قلت لأختي وقرايبي ضحكوا عليّ لأنهم متخيلين إني ماقدرش أعمل كده لأن أنا مش متعودة على الشغل وبابا وماما مش عودونا على الشغل.
بس أنا حاسة إن القرار ليّ أنا لأني كبرت ولازم أعتمد على نفسي وخايفة لو قلت لأهلي يطنشوني؛ لأنهم فيه حاجات كتير بيطنشوها لي، وكمان عايزة أعرف لو وافقوا أنا عايزة أعرف أدرس الموضوع ده إزاي أوي؛ لأني بجد مش عايزة أفشل وعايزة الناس وأهلي يعرفوا إني قد المسئولية وأقدر أعمل حاجة في حياتي مش دماغي فاضية بجد، نفسي أنجح في المشروع ده أوي ماعلش أنا طولت عليكم بس بجد نفسي حد يساعدني وشكرا.
asma

لو عايز تفضفض لنا دوس هنا