أولا باشكر بص وطل ع المجهود الرائع اللي بتعملوه للشباب وإنكم بتصححوا طريقهم. مشكلتي إني بحب واحدة أشبه بالملاك مش إنسانة؛ قمة الاحترام والأدب والعقل الناضج أنا عندي 20 سنة ومعايا دبلوم متوسط وهي أصغر مني بأربع سنين، اتعرفت عليها من على النت؛ بس كلامنا في حدود الاحترام، وعمرنا ما حسينا إننا عايزين نشوف بعض لأن أنا بارفض كده علشان باخاف عليها، وهي كمان رافضة الحكاية دي. هتقول لي: فين المشكلة؟ المشكلة إنها لسه بتدرس وأنا قلت لها: لما تخلصي دراسة هاجي أتقدم لك، وفيه عرسان كتير بيتقدموا لها؛ لكن إحنا متفقين إني أتقدم لها بعد أربع سنين، أنا كلمت أهلي وأمي وإخواتي، ومش معترضين وحبيبتي كلمت أختها دي؛ بالإضافة إنها كلمت أمي وإخواتي أنا علشان نبقى في النور، وكمان مش باقول لها كلمة بحبك أو وحشتيني لأنها بترفض كده علشان مش عايزين نغضب ربنا أنا خايف موضوع الارتباط ده يفشل خصوصا إنها من محافظة تانية إحنا ما نقدرش نستغني عن بعض، إحنا روح واحدة ومتفاهمين لأبعد الحدود، أنا محتاج رأيكم. وآسف على الإطالة. yassen_shiko