قالب كيكة الموز على "سفرة دايمة"

النهارده على "سفرة دايمة" هنقدم لكم طريقة جديدة لعمل الكيك وهو قالب الكيك بالموز، والكيكة دي شهية جدا ومحببة لكل الأطفال، جربوها وابعتوا لنا رأيكم فيها.
قالب كيكة الموز
المقادير:
1/ 2 كيلو سكر
3/ 4 كيلو موز طري
3/ 4 كيلو دقيق
1/ 4 كيلو لبن
2 بيض
3/ 4 كوب زيت
رشة فانيليا
رشة ملح
ملعقة كبيرة بيكنج بودر
الطريقة:
1- حطي السكر والبيض في العجّانة أو اضربيهم بالمضرب الكهربائي، وحطي عليهم الفانيليا والملح واضربي الخليط كويس.
2- بعد كده اهرسي الموز مع اللبن كويس أوي لحد ما يمتزجوا، وبعدين ضيفي الخليط على البيض والسكر، واخلطي الدقيق مع البيكنج بودر وحطيه مع خليط البيض.
3- استمري في خفق الخليط لحد ما يمتزج كويس، وبعدين صبيه في القالب بعد ما تدهنيه زيت أو زبدة ودخّليه الفرن على درجة حرارة 150 لمدة 40 دقيقة.
4- بعد ما يستوي ولونه يبقى دهبي طلعيه من الفرن وقطعيه شرايح وزينيه بشرائح الموز، وقدّميه.. بالهنا والشفا.

خلصت وصفاتنا النهارده..
استنونا كل يوم مع وصفات جديدة..
سلام،،،