وصفتنا النهارده على "سفرة دايمة" هتكون نوع جديد من أنواع السوفليه؛ وهو سوفليه البرتقال، جرّبوه وابعتوا لنا رأيكم فيه، وكمان ابعتوا لنا كل الوصفات اللي عايزين تعرفوها. سوفليه البرتقال المقادير: 4 حبات برتقال عصير ليمونة 4 بيضات 2 ملعقة كبيرة زبدة 2 ملعقة كبيرة دقيق 3 ملعقة كبيرة سكر سكر بودرة للتزيين الطريقة: 1- قسّمي البرتقال نصفين، وفرّغي فصوص البرتقال منه واعصريه، وبعدين اخلطيه مع عصير الليمون. 2- قطّعي قشر البرتقال لشرايح رفيعة، وانقعيها في ميه مغلية لمدة 5 دقائق. 3- حُطّي الزبدة في حلة صغيرة على النار لحد ما تسيح، وبعدين حُطّي معاها الدقيق، وقلّبيهم باستمرار لحد ما الدقيق يتشرب الزبدة. 4- بعدين حُطّي عليهم العصير وقشر البرتقال، وقلّبيهم باستمرار لحد ما الخليط يبقى كثيف ويوصل لدرجة الغليان، وسيبيه لمدة دقيقتين. 5- اضربي صفار البيض مع السكر لغاية ما قوامهم يبقى كثيف، وصبّيه على الصوص، وبعدين اضربي بياض البيض لحد ما يشكل كريمة. 6- حُطّي ملعقة من خليط البياض على الصوص وقلّبيها، وبعدين ضيفي باقي الكمية تدريجيا لحد ما تخلصي كل الكمية. 7- رشّي من السكر في القوالب اللي هتستخدميها، وبعدين صُبّي فيهم الخليط، ودخليهم الفرن على درجة حرارة 200 لمدة 25 دقيقة، أو لحد ما السوفليه يرتفع. 8- بعد ما يطلع من الفرن ويبرد رُشي عليه سكر بودرة، وقدّميه.. وبالهنا والشفا.
خلصت حلقتنا النهارده.. استنونا كل يوم مع أكلات جديدة.. سلام،،،