ننشر أقوال السائق في واقعة مطاردة فتيات طريق الواحات

باشرت النيابة العامة بأكتوبر، تحقيقات موسعة في واقعة مطاردة فتيات طريق الواحات ، وحصلت «بوابة أخبار اليوم» على أقوال شاهد عيان بواقعة حادث فتيات طريق الواحات.
اقرأ أيضا| ننشر نص التحقيقات مع إحدى ضحايا واقعة مطاردة طريق الواحات| مستندات
وجاءت أقواله علي النحو التالي:
س: ما معلوماتك بشأن الواقعه محل التحقيق؟
ج: اللي حصل إن أنا شغال في شركة المقاولين العرب على عربية نقل، ويوم الواقعة أنا كنت محمل على الأسفلت العربية ورايح بيها عشان إحنا بتعمل مرمات على الطريق قدام مساكن عثمان، والمهم أنا كنت مهدي السرعة خالص عشان الملف كان قريب وملتزم في الحارة الشمال، لقيت فجأة حاجة خبطت في العربية من ورا جامد، وبعدين لقيت كل عربية مشغلين الانتظار وجريوا علطول على الطريق كأنهم عاملين حاجة، وبعدها أنا نزلت أشوف في إيه لقيت عربية فيها بنات خابطين في العربية بتاعتى، وبس دا كل اللى حصل.
س: متي وأين دارت أحداث تلك الواقعة؟
ج: الحادثة دى كانت الصبح يوم الأربعاء في طريق الواحات قدام مساكن عثمان.
س: ومن كان برفقك أنذاك؟
ج: كنت لوحدي.
س: وما مناسبة وجودك بالمكان والزمان سالقى الذكر؟
ج: كنت محمل أسفلت في العربية النقل وكنت بلف من قدام مساكن عثمان عشان بعمل مرمات في الطريق.
س: صف لنا تحديدا كيفية وقوع الحادث؟
ج: الحادثة حصلت إن أنا وأنا سابق عربيتي ومهدي السرعة خالص لقيت فجأة عربية خبطت فيا من ورا جامد.
س: أي من حارات الطريق كنت تستقلها؟
ج: أنا كنت ماشي في الحارة الشمال.
س: وماذا كانت حالة الطريق من حيث المارة والزحام؟
ج: الطريق كان قاضي.
س: وماذا كانت حالة حارات الطريق من حيث الإصلاحات؟
ج: لا مكنش فيه إصلاحات والطريق كان كويس.
س: إذن ما التصرف الذي بدر منك عقب اصطدام سيارة المجني عليها بك؟
ج: أنا لقيت الأول في كذا عربية ماشين ومشغلين الانتظار وبيجروا كأن في حاجة وبعدين نزلت من العربية أشوف إيه اللى خبط فيا دا.
س: كم عدد السيارات التي أبصرتها آنذاك؟
ج: لا معرفش بس هما كانوا كذا عربية.
س: وما مواصفات وأرقام تلك السيارات؟
ج: لا مقدرش أحددهم.
س: وما الذي أبصرته تحديدا أنذاك؟
ج: لقيت عربية سودة فيها بنات، والعربية نصها تقريبا كان تحت العربية النقل بتاعتي.
س: كم عدد الفتيات بداخل تلك السيارة؟
ج: هما كانوا 3 بنات.
س: وما هي التلفيات التي أبصرتها بالسيارة قيادتهم آنذاك؟
ج: العربية بتاعتهم تقريبا جابت نص أمامي.
س: وماذا كانت حالة الفتيات الحيوية مستقلى تلك السيارة؟
ج: كلهم كانوا واعيين وواقفين على رجليهم عادي.
س: إذن ما الذي حدث عقب ذلك؟
ج: الناس ابتدات تتلم وفي ست بعربيتها وقفت وخدت البنات وطلعت على المستشفى وبعدها بشوية في ونش جه خد العربية.
س: ما هي الشركة مالكة السيارة اقتيادك؟
ج: شركة المقاولين العرب.