الكل كان بيجري كأنه عامل عاملة، أقوال سائق النقل بواقعة مطاردة فتيات الواحات (مستند)

حصلت فيتو على أقوال سائق النقل، الذي اصطدمت به سيارة الفتيات في حادث مطاردة الفتيات بطريق الواحات، وكشف تفاصيل مثيرة حول الحادث.
قال سائق السيارة النقل: اللي حصل إني شغال في شركة المقاولين العرب، ويوم الواقعة كنت محمل أسفلت علي الواقعة، ورايح بيها علشان إحنا بنعمل مرمات علي الطريق قدام مساكن عثمان، المهم أنا كنت مهدي السرعة خالص علشان الملف كان قريب وملتزم بالحارة الشمال، لقيت فجأة حاجة رزعت في العربية جامد وبعدين لقيت كل العربية مشغلين انتظار ووبيجرو علي الطريق كأنهم عاملين حاجة، وبعدها نزلت اشوف في ايه، لقيت عربية فيها بنات خابطة في عربيتي، وده كل اللي حصل.
وأضاف: الحادثة كانت الساعة ستة إلأا ربع تقريبا يوم الأربعاء علي طريق الواحات، كنت لوحدي، كانت تقريبا سرعتي 10 عشان الملف كان قدامي علطول.
أقوال المتهم الثاني في الحادث
ونفى المتهم الثاني فى حادث مطاردة فتيات طريق الواحات التهم المنسوبة إليه أمام جهات التحقيق.
وقال المتهم: أنا سواق أوبر وشغال على العربية، ويوم الحادثة كنت مخلص شغل وقولت هخش البنزينة عشان أسحب فلوس من المكنة، وبعدها قولت هروح وأخذت عربيتي وطلعت علي طريق الواحات، وفضلت ماشي لحد ما سمعت صوت عربية بفرامل وصوت حادثة وبعدها روحت على البيت وبعدها جيت على هنا ودا كل اللي حصل.
أقوال المتهم الثالث في التحقيقات
وكشف المتهم الثالث، «مهند. ج»، 24 سنة، طالب بكلية الهندسة، في حادث مطاردة فتيات طريق الواحات، تفاصيل مثيرة عن الحادث.
وقال المتهم: انا طالب هندسة، وكنت رايح الجامعة بتاعتي عادي، بس كلمت صحابي لقيتهم برة قولت أروح أقعد معاهم لحد ميعاد الجامعة، وقابلت واحد صاحبي اسمه (أحمد شعبان) وطلعنا قعدنا في كافية، وكان صاحبي عايز يدخل الحمام، وكانت الساعة 5:50 صباحا وفضلنا قاعدين لحد 6:10 صباحًا وبعدين وإحنا بنركب العربية شوفت 3 بنات لابسين لبس مش كويس، وبيركبوا عربيتهم عادي، وإحنا طالعين بقولهم (إيه جايين في سباق نشد سوا بالعربيات؟!).
واضاف:" وهُمّه في العربية راحوا ضحكوا بس محدش اتسابق ولا حاجة، وخلاص كملت طريقي وأنا راجع وحتى أنا كنت وراهم ومرة واحدة شوفت العربية بتاعة البنات دي خبطت في عربية نقل، كانت راكنة على الشمال فركنت عربيتي ونزلت بسرعة اتطمئن عليهم وساعدتهم وخرجت واحدة منهم من العربية، واطمنت عليهم، وبعدين روحت على البيت وبعدين الجامعة بتاعتي، وبعدها وأنا قاعد في البيت لقيت شرطة جاية وخدتني وخدت مفاتيح العربية وجابوني على القسم وعلى هنا النيابة النهارده، وهو ده كل اللي حصل".
اعترافات أحد المتهمين في حادث الواحات
وخلال التحقيقات كشف المتهمون تفاصيل مثيرة حول الحادث، حيث قال المتهم الأول: أنا كنت نازل مع مازن وكنا متفقين نروح يوم الأربع مشوار، وروحنا الصبح على بنزينة شيل أوت اللى في طريق المحور وقولنا نقعد شوية نشرب قهوة، وبعدها تتحرك ولما دخلنا البنزينة الدنيا كانت زحمة أوي، مكنش فيه مكان تركن فيه، فراح مازن قافل بعربيته على عربية من العربيات إلى هناك، وقال للناس هناك إن لو حد حب يطلع العربية بتاعته هو قاعد جوا، وبعدين قعدنا ومعداش غير دقايق في حد جه من الشباب الى كانت واقفة، وقال إن هو عايز يطلع من الركنة، مازن قال خلاص إحنا نتحرك للبيت وأجيب فلوسي وبعدين نروح المشوار عشان ندفع الفلوس فطلعنا ركبنا العربية وطلعنا على بيت مازن.
وأضاف المتهم الأول في حادث طريق الواحات أمام جهات التحقيق: إحنا في طريق الواحات كان في عربية بي إم، وعربية جيلي، وعربية أفيو ماشيين جنبنا، وكانت كل شوية العربية الأفيو عمالة ترمي علينا، وحبينا نطلع منها كان فيه عربية نقل واقفة، ومازن صاحبي عدى منها وسمعنا بعدها صوت عربية بتخبط في العربية النقل، وبعدها مشينا روحنا على البيت وقعدنا شوية، وعلى الساعة 11 بليل فيه واحد کلم قريب مازن وقالوا إن هو معاون مباحث قسم ثالث، وإن هو عايز مازن فأنا روحت معاه عادي، وبعدها طلب العربية بتاعت مازن، فرحنا جبناها وروحنا على القسم، وهناك لاقيتهم بيسألوا مازن وبيقولوا مين كان معاك.. قالهم عبد الرحمن، راحوا خادوني، وخلوني في القسم وجيت انهاردة.
أولى جلسات محاكمة المتهمين في واقعة مطاردة الفتيات
وتنظر محكمة أكتوبر غدا الإثنين 18 أغسطس، أولى جلسات محاكمة المتهمين في واقعة مطاردة الفتيات على طريق الواحات، وذلك لاتهامهم بإصابة الفتيات نتيجة مطاردتهم للضحايا وتعمد مضايقتهن.
حبس المتهمين في واقعة مطاردة طريق الواحات
وفي وقت سابق، قررت جهات التحقيق بأكتوبر، حبس المتهمين في واقعة مطاردة طريق الواحات 4 أيام على ذمة التحقيقات، وذلك لاتهامهم بإصابة الفتيات نتيجة مطاردتهن للضحايا وتعمد مضايقتهن.
التحريات تكشف تفاصيل مطاردة فتيات
التحريات الأولية كشفت أن الفتيات كن يتواجدن في أحد المقاهي بالحي الأول ب6 أكتوبر، ولاحظن مضايقات من ثلاثة شبان، فقررن المغادرة.
إلا أن الشبان لاحقوهن على الطريق، وبدأوا في التضييق عليهن، مع تهديدات صريحة من أحدهم: "اقفي يا بت.. اقفي وإلا هزعلك".
ورغم محاولة السائقة، رنا إبراهيم، الإفلات منهم، إلا أنهم ضيقوا الخناق عليها حتى اصطدمت بسيارة النقل على يسار الطريق، ما تسبب في إصابتها باشتباه ارتجاج في المخ، وإصابة صديقتها التي كانت تجلس بجوارها بجروح كبيرة في الرأس نتيجة تطاير الزجاج، بينما نجت الفتاة الثالثة لجلوسها في المقعد الخلفي.
وجرى نقل المصابات إلى المستشفى لتلقي العلاج اللازم، فيما أكدت رنا أنهن حررن محضرا رسميا ولن يتنازلن عن حقهن، مؤكدة أنهن كن على بعد لحظات من الموت.
النيابة العامة تباشر التحقيق
وباشرت النيابة العامة في أكتوبر التحقيق، واستعلمت عن الحالة الصحية للفتيات تمهيدًا لسماع أقوالهن، وأمرت بسرعة تحديد وضبط المتهمين وعرضهم على المجني عليهن، إلى جانب جمع وتفريغ كاميرات المراقبة على طريق الواحات لمواجهة المتهمين بالأدلة المصورة.
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوداث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.
تابع موقع فيتو عبر قناة (يوتيوب) اضغط هنا
تابع موقع فيتو عبر قناة (واتساب) اضغط هنا
تابع موقع فيتو عبر تطبيق (نبض) اضغط هنا
تابع موقع فيتو عبر تطبيق (جوجل نيوز) اضغط هنا