كبدة الفراخ بدبس الرمان على "سفرة دايمة"

لو بتحبّي تجددي في أطباقك وأكلاتك، هنقدّم لك النهارده على "سفرة دايمة" أكلة جديدة وسريعة؛ وهي كبدة الفراخ بدبس الرمان، جرّبيها وقولي لنا رأيك فيها.

كبدة فراخ بدبس الرمان
المقادير:
1/ 2 كيلو كبدة
ملعقة كبير ثوم مفروم
ملعقة صغيرة كمون
ملعقة كبيرة كزبرة خضراء
ملح وفلفل
كوب دبس الرمان
ملعقة كبير عصير ليمون
الطريقة:
1- اسلقي الكبدة في ميه، ومعاها ملعقة خل، وسيبيها لحد ما تدخل في السوى.
2- شوّحي الثوم في الزيت لحد ما يبقى لونه دهبي، وبعدين ضيفي عليه الكبدة، وقلّبيهم مع بعض شوية، وبعد كده ضيفي عصير الليمون، وتبلي الخليط بالملح والفلفل.
3- في الآخر ضيفي دبس الرمان والبقدونس والكمون، وسيبي الكبدة على النار لمدة 10 دقائق مع التقليب من وقت للتاني؛ لحد ما الكبدة تشرب الصوص، وبعدين حُطّيها في طبق التقديم وزينيها بالبقدونس وقدّميها مع رز أبيض.. وبالهنا والشفا.

خلصت وصفتنا النهارده..
استنونا كل يوم مع أكلة جديدة..
سلام،،،