كباب وكفتة وطرب.. وممبار محمر على "سفرة دايمة"

لسه مكملين معاكم باقي أكلات العيد.. والنهارده في تاني أيام العيد، هنقدم لكم الكباب والكفتة المشوية، ومعاهم الممبار المحمر، تابعونا.
مشويات مشكّلة
المقادير:
كيلو لحمة ضاني للكباب (يفضّل تكون من منطقة الفخذ)
1/ 2 كيلو لحمة ضاني مفرومة للكفتة (يفضّل تكون نسبة الدهن فيه مش أكتر من 20%)
1/ 2 كيلو ريش ضاني
4 حبات بصل متوسطة
كوب بقدونس مفروم
ملح وفلفل
1/ 2 كوب عصير ليمون
2 كوب عصير طماطم
زعتر
الطريقة:
1- ابشري البصل، وحطي عليه شوية خل وملح صغيرين؛ علشان ينزّل الميه بتاعته، وبعد كده صفّيه من الميه كويس، واعصريه وسيبيه على جنب.

2- حطّي قطع اللحمة الخاصة بالكباب والريش في مية البصل، وتبّليهم بالملح والفلفل، وضيفي معاهم شوية زعتر، وعصير طماطم، وعصير ليمون، وملح وفلفل، وغطّيه وشيليه في الثلاجة لمدة 3 ساعات على الأقل؛ علشان تتشرّب من التتبيلة.

3- بالنسبة لبشر البصل هتستخدميه لعمل الكفتة، وده بإنك تحطيه على اللحمة المفرومة، وضيفي معاه البقدونس، وبعدين تبليها بالملح والفلفل.

4- حطّي قطع اللحم (الكباب) في الأسياخ؛ بس راعي إن عددها يكون قليل، وتكون في منتصف السيخ.

5- صبّعي اللحمة المفرومة على الأسياخ، مع الضغط عليها علشان حجمها يبقى متساوي.

6- حطّي أسياخ الكباب والكفتة مع الريش على الشواية، وسيبيهم لغاية ما يستووا؛ بس راعي إن كل حاجة منهم ليها توقيت في التسوية؛ فلازم تكوني منتبهة كويس علشان الحاجة ما تنشفش منك، وكمان لما تحطي الكفتة على الشواية سيبيها لمدة دقيقتين، وبعد كده أقلبيها على الجنب التاني، علشان تتماسك كويس، وما تفكش من السيخ.
عند التقديم ممكن تقدّمي معاهم خضراوات مشوية وسلطة خضراء.. وبالهنا والشفا.
الطرب
علشان تعملي الطرب بتجيبي المنديل (الغلاف الرقيق اللي بيُحيط بالمعدة)، وبتتبليه بنفس التتبيلة الخاصة بالكباب، وبعد كده بتحشيه بخلطة الكفتة، وتقفليه كويس من كل الجوانب، وبعد كده حطيه على الشواية لغاية ما يستوي.. وبالهنا والشفا.

***************************

الممبار المحشي
الممبار المحشي
المقادير:
1/ 2 كيلو ممبار
2 كوب رز
2 حبة بصل
7 حبات طماطم
2 كوب بقدونس مفروم
كزبرة خضراء مفرومة
كوب شبت مفروم
فلفل حامي
سمنة أو زيت
ملح وفلفل
الطريقة:
1-اغسلي الرز كويس وسيبيه يصفّي ميته.
2-حضّري الخلطة اللي هتحشي بها الممبار، وكل اللي عليكِ إنك تخلطي كل المكونات مع بعضها؛ وهي الشبت والبقدونس والكزبرة والطماطم المفرومة والبصل المفروم والفلفل المفروم، وتبّليها بالملح والفلفل والكمون وشوية سمنة أو زيت، وحطيهم على الرز وقلّبيهم كويس.
3-هاتي القمع وابدئي احشي الممبار، بس خلّي بالك إنك ماتمليش الممبار أوي بالخلطة؛ يعني كفاية تحشيه للثلث أو النصف، وبعد كده تضغطي على الممبار بإيدك على خفيف علشان توّزعي الخلطة كويس، وممكن بعد كده إنك تربطي أطراف الممبار بخيط صغير علشان الأرز ما ينزلش منه أثناء السلق.
4-هاتي حلة كبيرة، وحطّي فيها ميه وملح، وسيبيها على النار لغاية ما الميه تغلي، وبعدين ابدئي نزّلي الممبار واحدة واحدة، وطبعاً هتلاحظي إن الممبار انكمش وحجمه بيصغر أول ما تنزّليه في الميه.
5-سيبيه على النار لحد ما تحسي إنه استوى، وهو بياخد وقت من 30: 50 دقيقة على النار.
6-بعد ما الممبار يتسلق حمّريه في الزيت، أو ممكن ترصّيه في صينية، وتدهني وشه بشوية زيت صغيرين، وتدخّليه الفرن لغاية ما وشه يحمرّ.. وبالهنا والشفا.

خلصت وصفاتنا النهارده..
تابعونا واستنونا يوميا على "سفرة دايمة" علشان لسه معانا أكلات تانية كتير..
سلام،،،