عزومة 7 رمضان

عصير الشمام
العصير ده لذيذ ومفيد جداً، وفيه فيتامينات مفيدة جداً للجسم..
المقادير:
* 1/4 شمامة
* معلقة ماء ورد
* معلقة فانيليا
* سكر
* مكعبات ثلج
الطريقة:
اضربي كل المقادير مع بعضها في الخلاط، وبعد كده صبيها في كاسات العصير، وضيفي إليها مكعبات الثلج.

*****************

شوربة اللحمة المفرومة مع الشعيرية
شوربة اللحمة المفرومة مع الشعيرية
المقادير:
* كيس شعيرية سريعة التحضير
* 1/4 كيلو لحمة مفرومة
* 6 كوبايات شوربة فراخ او لحمة
* بصلة مفرومة
* ملح وفلفل
الطريقة:
1- اخلطي اللحمة المفرومة مع البصل والملح والفلفل وقلبيهم كلهم مع بعض كويس علشان اللحمة تتبل.
2- شكّلي اللحمة على شكل كرات صغيرة ورصيها في صينية، وبعد كده دخليها التلاجة لمدة نص ساعة.
3- هاتي حلة وحطي فيها الشوربة وسيبها لغاية ما تغلي، وبعد كده ضيفي إليها الملح والفلفل، وسيبيها على النار لمدة عشرة دقائق، بعد كده ضيفي إليها كرات اللحمة وسيبيهم على النار لمدة نص ساعة لغاية ما اللحمة تستوي، وقبل أذان المغرب بنص ساعة حطيها على النار للتسخين وعند الغليان ضيفي عليها عبوة الشعيرية سريعة التحضير وسيبيها تغلي لمدة 5 دقائق بس، واطفي عليها وسيبي الحلة مقفولة لمدة 5 دقايق كمان وبعدين اغرفي الشوربة في أطباق التقديم.. وبالهنا والشفا.

*****************

سلطة البصل بالجزر
سلطة البصل بالجزر
المقادير:
* 3 بصلات متوسطة الحجم
* 3 جزرات متوسطة الحجم
* عصير ليمونة
* ملح وفلفل
الطريقة:
قطعي البصل والجزر شرائح طولية رفيعة وضيفي إليهم الليمون والملح والفلفل وقلّبيهم مع بعض كويس.

*****************

البامية باللحمة والليمون
البامية باللحمة والليمون
المقادير:
* كيلو لحمة (ضاني أو بتلو أو بقري)
* كيلو بامية
* 2 معلقة كبيرة زيت ذرة
* 2 معلقة كبيرة صلصة طماطم
* 3 أكواب عصير طماطم
* ملح وفلفل أسود
* 3 فصوص ثوم مدقوقين
* 3 معالق زبدة
* فلفل أخضر مقطع قطع صغيرة
* 2/1 معلقة صغيرة شطة مطحونة
* 3 بصلات مقطعة قطعاً صغيرة
الطريقة:
1- هاتي اللحمة واغسليها وقطعيها إلى قطع متوسطة الحجم، بعد كده هاتي حلة وحطي فيها اللحمة وحطيها على نار متوسطة الحرارة مع التقليب المستمر لغاية ما اللحمة تطلع ميتها وتشربها تاني، بعد ما تشربها ضيفي إليها 3 كوبايات مية، وضيفي إليها الملح والفلفل والبهارات، وسيبي اللحمة على نار هادية لغاية ما تلاقيها استوت.
2- أثناء ما اللحمة بتستوي هاتي البامية واغسليها كويس، وبعد كده سيبيها علشان تنشف وبعدين نظفيها كويس، وشيلي الجزء العلوي والجزء السفلي واغرسيها بالسكينة من المنتصف.
3- هاتي حلة وحطي فيها الزيدة والزيت، وضيفي ليها البصلة المقطعة وقلبيهم مع بعض لغاية ما البصلة لونها يبقى ذهبي، وبعد كده ضيفي الثوم المدقوق والبامية وقلبيهم مع بعض لمدة ربع ساعة، وضيفي إليهم الفلفل المقطع مع استمرار التقليب لمدة خمس دقائق.. بعد كده ضيفي عصير الطماطم وصلصة الطماطم والملح والفلفل والشطة الحمراء، وسيبيهم على النار لغاية ما تلاقي إن الطماطم قوامها بقى سميك، ضيفي إليها اللحمة وكوباية كبيرة شوربة اللحمة وسيبيهم على النار لغاية ما البامية تستوي.
4- قبل أذان المغرب بربع ساعة اغرفي البامية في أطباق التقديم، وضيفي ليها عصير الليمون.. وبالهنا والشفا.

*****************

القطايف بالمهلبية
القطايف بالمهلبية
المقادير:
* 2/1 كيلو قطايف
* كوب لبن
* 1/2 كوب نشا
* 1/2 كوب سكر
* 1/2 معلقة صغيرة فانيليا
* زيت عباد الشمس للقلي
مقادير الشربات:
* 1/2 كوب سكر
* 3/4 كوب مية
* عصير ليمونة
* فانيليا
طريقة عمل الشربات:
حطي السكر والمية كلهم مع بعض في إناء على نار هادئة لمدة ربع ساعة. بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.
الطريقة:
1- اخلطي اللبن والسكر والفانيليا والنشا في إناء متوسط، ودوبيهم مع بعض، بعد كده حطيهم على نار متوسطة مع التقليب المستمر لغاية ما تغلي كويس شيليه من على النار وسيبيه لما يبرد، وبكده يبقى أنتِ حصلتِ على المهلبية اللي هتحشي بيها القطايف.
2- هاتي القطايف واحشي كل واحدة بمعلقة صغيرة من المهلبية في منتصف كل واحدة من القطايف؛ بس خدي بالك إن الحشو ده يكون في وسط قرص القطايف واقفلي قرص القطايف بالضغط عليه بإيدك، وخدي بالك إنك تتأكدي من عدم وجود أي حشو ظاهر.
3- بعد ما تخلصي حشو القطايف كلها هاتي طاسة وسخّني فيها الزيت كويس، وبعد كده اقلي القطايف على درجة حرارة متوسطة لغاية ما تلاقي لون القطايف بقى ذهبي وشيليها من الزيت وحطيها في الشربات، وبعد كده تطلعيها من الشربات وتحطيها في مصفاة علشان تتخلصي من الشربات الزيادة. بعد كده حطيها في طبق الحلويات.

*****************
وبكده تكون خلصت عزومتنا النهارده، وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة اوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة ومش عارفة تعمليها ابعتي وقولي لنا عليها واحنا هنقول لك على الطريقة على طوووول..

وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************